გასაუბრება სტიპენდიისთვის/უნივერსიტეტში ჩასარიცხად


applicaiton-interviewგასაუბრება სასტიპენდიო პროგრამებისთვის ერთ-ერთი მნიშვნელოვანი შემადგენელი ნაწილია. ხშირად ეს არის გადამწყვეტი ეტაპი – ხდება კანდიდატების შერჩევა და გაცხრილვა. ამიტომ მნიშვნელოვანია რომ მისთვის კარგად მოემზადოთ.

თქვენი მიზანი გასაუბრებისას არის საკუთარი ძლიერი მხარეების წარმოჩენა. გახსოვდეთ, რომ გასაუბრება არის დიალოგი (და არა მშრალი კითხვა-პასუხის სესია) და აბსოლუტურად თქვენზეა დამოკიდებული რას ეტყვით და რით დაამახსოვრებთ თავს გადაწყვეტილების მიმღებ პირს. თქვენ ხართ ის ადამიანი, რომელიც ყველაზე კარგად იცნობს საკუთარ თავს, იცის მისი მისწრაფებები, მიზნები და ეს უნდა გასაგებად აუხსნას დიალოგის მეორე მონაწილეს. მხოლოდ თქვენ წყვეტავთ, საკუთარი პირადი თუ პროფესიული ცხოვრების რა დეტალები და რა ფორმით მოყვეთ, როგორი ემოციები და ასოციაციები გამოიწვიოთ მსმენელში.

ზოგიერთი რჩევა:

  • ისაუბრეთ თავდაჯერებულად. თავდაჯერება საქმის ნახევარს აკეთებს 🙂 ასევე გამსაუბრებელს მიანიშნებს იმაზე, რომ დარწმუნებული ხართ საკუთარ არჩევანში, კარგად იცნობთ სფეროს და მკაფიოდ ჩამოყალიბებული მიზნები გამოძრავებთ.
  • საუბრის მანერა – ეცადეთ ისაუბროთ მშვიდად, ზომიერი ტემბრით. ეცადეთ დაფაროთ საკუთარი მღელვარება. კონცენტრაცია მოახდინეთ საუბრის შინაარსზე, ეფექტურ პრეზენტაციაზე და არა საკუთარ ემოციებზე – ეს ის შემთხვევაა, როცა ეგოიზმი უნდა დაივიწყოთ. 🙂 მოერიდეთ დიდ პაუზებს. თუ კითხვა ვერ გაიგეთ, აუცილებლად ჰკითხეთ, დააზუსტებინეთ.
  • წინასწარ მოემზადეთ გასაუბრებისათვის. ეს ნიშნავს, რომ დეტალურად შეისწავლოთ პროგრამა, უნივერსიტეტი, სასწავლო გარემო და საგნები, შეძლებისდაგვარად გაეცნოთ გამსაუბრებლის შესახებ ინფორმაციას (აბა რისთვის არსებობს საძიებო სისტემები და სოციალური ქსელები 😉 ); ასევე გააანალიზოთ საკუთარი მისწრაფებები, მიზნები, გეგმები. დაალაგოთ სათქმელი და მოემზადოთ მხოლოდ სიმართლის სასაუბროდ. გასაუბრებაზე ტყუილის თქმა არ ღირს. გაწაფული დეიდები და ბიძიები მაინც გამოგიჭერენ და ასეთ შემთხვევაში სამუდამოდ დაემშვიდობებით იმ პროგრამაში/უნივერსიტეტში ჩარიცხვის შესაძლებლობას. სხვა საქმეა ფაქტების ეფექტურად შეფუთვა და წარმოჩენა 🙂
  • ლექსიკა – დაბალანსებული, მოერიდეთ ძალიან პროფესიული ტერმინების, აბრევიატურების გამოყენებას. შეიძლება გასაუბრებას ატარებდეს ადამიანი, რომელსაც კონკრეტულ სფეროსთან შეხება არ აქვს და მხოლოდ კანდიდატის მზაობას ამოწმებს კონკრეტული პროგრამისთვის/უნივერსიტეტისთვის.
  • კითხვები – ინერვიუმდე მოამზადეთ კითხვები. ამით მათ დაანახებთ, რომ დაინტერესებული ხართ კონკრეტული პროგრამით. რა შეიძლება ჰკითხოთ? მაგალითად: თუ აქვს პროგრამას ალუმნების ქსელი? გაუგებარი დეტალები, პროგრამის სწავლების მეთოდოლოგია, საცხოვრებელი პირობები, თქვენი ვალებულებები და ა.შ. ნებისმიერი რამ, რაც მასთან დაკავშირებულია და მოცემული არ არის პროგრამის/უნივერსიტეტის ვებსაიტზე, ბუკლეტში.

business-attireქვემოთ მოცემულია შესაძლო კითხვები აკადემიური გასაუბრებისათვის. “შესაძლო” ნიშნავს, რომ ეს არის საორიენტაციო ჩამონათვალი. რეალურად გასაუბრებაზე პასუხისმგებელ პირზეა დამოკიდებული რას გკითხავთ, რას ჩაუღრმავდება, რა საკითხების ხაზგასმას მოინდომებს.

  • მოგვიყევით თქვენს შესახებ – ბევრი ორგანიზაცია/პროგრამა იწყებს გასაუბრებას ამ ბანალური კითხვით. აქ 1-2 წუთში უნდა მოახერხოთ საკუთარი თავის ეფექტურად წარმოჩენა, ძირითადი მიღწევების ხაზგასმა განათლებისა და პროფესიული განვითარების მიმართულებებით. თუ ეს სამაგისტრო პროგრამაა, არ ღირს სასკოლო გამოცდილების ხსენება (თუ ეს არ არის იმ პერიოდში დაწყებული გრძელვადიანი პროექტი, ან პირდაპირ დაკავშირებული კონკრეტულ პროგრამასთან). შეგიძლიათ ახსენოთ სამოხალისეო გამოცდილება, საკუთარი ინიციატივა, პირადი ისტორია – თუ კონკრეტულ სფეროსთან არის დაკავშირებული.
  • რატომ კონკრეტულად ეს პროგრამა და/ან ეს უნივერსიტეტი? რამ მოახდინა გავლენა თქვენს გადაწყვეტილებაზე? წარმოადგინეთ არგუმენტები და კონკრეტული მიზეზები.
  • კვლევითი პროგრამი შემთხვევაში: -რა კონკრეტულ პროექტზე გსურთ მუშაობა? რა საკითხს გამოიკვლევთ? რა კვლევით მეთოდებს გამოიყენებთ? ვისთან გსურთ მუშაობა? (აქ იგულისხმება კონკრეტული მკვლევარი/პროფესორი, რომელიც მუშაობს ამ უნივერსიტეტისთვის ან პროგრამისთვის).
  • ბოლოს რა წიგნი წაიკითხეთ? მერე რა, რომ მსოფლიო კლასიკოსები შეიძლება გქონეთ წაკითხული. ამ შემთხვევაში უნდა დაასახელოთ აკადემიური გამოცემა თქვენს მიერ არჩეულ სფეროში.
  • ამ სფეროში რომელ ავტორებს იცნობთ? უნდა ახსენოთ ისევ პროფესიასთან დაკავშირებული პუბლიკაციები და ავტორები.
  • თქვენი განათლებისა და სამუშაო ისტორიიდან გამომდინარე კონკრეტული კითხვები: – ამჟამად სად მუშაობთ? რა შედის თქვენს მოვალეობებში? რა ინიციატივები გაქვთ განხორციელებული? რამდენი ხანია რაც მანდ მუშაობთ და რა მოგწონთ ან არ მოგწონთ თქვენს სამუშაოში? რა არის ყველაზე დიდი გამოწვევა? ბოლოს რა პროექტი განახორციელეთ? გყავთ თუ არა ადგილობრივი ან საერთაშორისო პარტნიორები? არასამთავრობო ორგანიზაციის შემთხვევაში – რომელი დონორებისგან გაქვთ დაფინანსება მიღებული? ასევე – დეტალები კონკრეტული პროექტის/ინიციატივის შესახებ: ვინ მონაწილეობდა? რამდენი ადამიანი? რა შედეგებს მიაღწიეთ? რა პრობლემებს ხედავ და შენი აზრით, როგორ შეიძლება მათი ეფექტურად მოგვარება?

საყურადღებო დეტალები (არსებობის შემთხვევაში):

  • ახსენეთ ლიდერობის გამოცდილება – მაგალთად, საკუთარი ინიციატივით განხორციელებული კონკრეტული ღონისძიება, იქნება ეს ერთჯერადი თუ გრძელვადიანი პროგრამა. ან როგორ მიიღეთ მონაწილეობა მნიშვნელოვანი პროგრამის ჩამოყალიბებაში/განხორციელებაში.
  • ახსენეთ პარტიორობა და თანამშრომლობა სფეროს ექსპერტებთან, ორგანიზაციებთან.
  • დაანახეთ მომავლის კონკრეტული ხედვა და ცვლილებისათვის მზაობა – რა გურთ აკეთოთ საშუალოვადიან და გრძელვადიან პერსპექტივაში.

წარმატებას გისურვებთ.

Advertisements

გამგზავრებამდე საჭირო ინფორმაცია


Scholarship საზღვარგარეთ სასწავლებლად გამგზავრებამდე მთელი რიგი ინფორმაციის მოძიებაა აუცილებელი. ზარმაცი ადამიანის ლოგიკა – “ჩავალ და ადგილზე გავარკვევ” – ამ შემთხვევაში უნდა დაივიწყოთ: ჩასვლის შემდეგ ისედაც ბევრი მოსაგვარებელი დეტალი გამოხტება, ასევე შეიძლება იყოს კულტურული შოკი, ათასი ნამდვილი და მოგონილი მიზეზი, რომელიც საქმის კეთებაში ხელს შეგიშლით. როდესაც არსებობს ინტერნეტი, სავსებით შესაძლებელია მაქსიმალური ინფორმაციის მოძიება და გარკვევა რიგი მნიშვნელოვანი საკითხების შესახებ. კერძოდ:  Continue reading

TOEFL iBT თუ EILTS?


TOEFL და IELTS ინგლისური ენის ორი საერთაშორისო აკადემიური ტესტია, რომელთა შედეგებსაც აღიარებენ უცხოეთის უნივერსიტეტები. ორივე ტესტს ერთი და იგივე დანიშნულება აქვს და ხშირად საზღვარგარეთ სწავლის მსურველები კითხულობენ თუ რომელი სჯობია.

TOEFL ამერიკული ტესტია, IELTS – ბრიტანული. ისინი სტრუქტურულად ერთმანეთის მსგავსია (მოიცავს მოსმენის, წერის, კითხვისა და საუბრის კომპონენტებს), თუმცა შიდა აგებულება და სპეციფიკა განსხვავებული აქვთ,.

უფრო დაწვრილებით ტოეფელის სტრუქტურის შესახებ: TOEFL iBT  სტრუქტურა

IELTS-ის სტრუქტურის შესახებ: IELTS სტრუქტურა

დანარჩენ განსხვავებებს რაც შეეხება:  Continue reading

IELTS გამოცდა


IELTS გამოცდის ადმინისტრირებას ახდენს ბრიტანეთის საბჭო. გამოცდისთვის რეგისტრაცია ხდება მათი ვებსაიტიდან. გამოცდის თარიღები განსაზღვრულია მთელი წლისთვის და მხოლოდ იმ კონრეტულ დღეებში შეიძლება გასვლა. რეკომენდირებულია გამოცდაზე რეგისტრაცია სასურველ თარიღამდე 5 კვირით ადრე. რაც უფრო უახლოვდება გამოცდის თარიღს, უფრო მცირდება ადგილების რაოდენობა.

IELTS გამოცდა ტარდება მხოლოდ თბილისში. თუ რეგიონში ცხოვრობთ, მოგიწევთ ჩამოსვლა. მგზავრობის ხარჯები იქნება თქვენი გადასახდელი. ერთადერთი შეღავათი, რასაც ბრიტანეთის საბჭო აკეთებს რეგიონში მცხოვრებლებისთვის, არის საუბრის სექციის იმავე დღეს დანიშვნა.  Continue reading

IELTS სტრუქტურა


IELTS შედგება 4 კომპონენტისგან: მოსმენა, კითხვა, წერა და საუბარი.

გამოცდა იწყება მოსმენის სექციით: გასმენინებენ სხვადასხვა ტიპის რამდენიმე ჩანაწერს, რომელთა საერთო ხანგრძლივობა 30 წუთია.

  • ჩანაწერი 1 – ორი ადამიანის საუბარი ყოველდღიური თემის შესახებ
  • ჩანაწერი 2 – მონოლოგი ყოველდღიური თემის შესახებ
  • ჩანაწერი 3 – საუბარი რამდენიმე ადამიანს შორის (მაქსიმუმ 4) საგანმანათლებლო ან ტრენინგის თემის შესახებ (მაგალითად, უნივერსიტეტის ლექტორი და სწტუდენტი განიხილავენ დავალებას)
  • ჩანაწერი 4 – მონოლოგი აკადემიური საგნის შესახებ (მაგალითად, უნივერსიტეტის ლექცია).

Continue reading

რა არის IELTS


IELTS (The International English Language Testing System) არის საერთაშორისო ინგლისური ენის ტესტის სისტემა, რომელიც ადგენს ინგლისური ენის ცოდნის დონეს. მის ადმინისტრირებას ახდენს ბრიტანეთის საბჭო. ტესტის შედეგებს აღიარებენ როგორც ბრიტანეთის, ისე ამერიკის, კანადის, ევროპის, ავსტრალიისა და სხვა ქვეყნების ინგლისურენოვანი უნივერსიტეტები.

ვისთვის არის განკუთვნილი IELTS?

  • ვისთვისაც ინგლისური არ არის მშობლიური ენა, ან განათლება არ აქვს მიღებული ინგლისურენოვან სასწავლებელში
  • ვისაც სურს ინგლისურენოვან უნივერსიტეტეში, კოლეჯში, სკოლაში სწავლის გაგრძელება
  • ვისაც სურს მონაწილეობა ინგლისურენოვან გაცვლით ან პროფესიულ პროგრამაში
  • ვისაც სურს ბრიტანეთში, ახალ ზელანდიაში, კანადაში ან ავსტრალიაში მუშაობა.

Continue reading

როგორ დავწეროთ სარეკომენდაციო წერილი


თუ გჭირდებათ დახმარება სამოტივაციო წერილის, სარეკომენდაციო წერილის ან საზღვარგარეთ სწავლასთან დაკავშირებული სხვა დოკუმენტის შედგენაში, უნივერსიტეტის, პროგრამის, დაფინანსების მოძიებაში, სააპლიკაციო პროცესში, მომწერეთ ბლოგის საკონტაქტო ფორმის ან ფეისბუქის საშუალებით, ასევე შეგიძლიათ დამიკავშირდეთ ნომერზე: 557 516 388. მომსახურება იქნება ფასიანი. 

————————————————

სარეკომენდაციო წერილი არის საქმიანი წერილი, საუნივერსიტეტო აპლიკაციის ერთ-ერთი მნიშვნელოვანი შემადგენელი ნაწილი. ამიტომ მისი დაწერისას უნდა გამოიყენოთ ფორმალური ფორმატი.

რა მიზანს ემსახურება სარეკომენდაციო წერილი:

  • უნდა შეაფასოს აპლიკანტის სამეცნიერო-კვლევითი პოტენციალი
  • უნდა შეაფასოს მზაობა აკადემიური სივრცისათვის
  • უნდა შეაფასოს აკადემიურ სივრცეში წარმატებისთვის საჭირო ცოდნა/უნარები.

ვინ შეიძლება იყოს რეკომენდატორი?

  • ადამიანი, რომელიც კარგად გიცნობთ, შეუძლია თქვენი აკადემიური შესაძლებლობების შეფასება
  • პროფესორი, ლექტორი, მასწავლებელი, რომელიც უნივერსიტეტში/სკოლაში გასწავლიდათ.
  • სამსახურის უშუალო ზედამხედველი, უფროსი, რომელიც თვალყურს ადევნებდა თქვენი მუშაობის პროცესს და კარგად იცნობს თქვენს პროფესიულ თვისებებს

სარეკომენდაციო წერილის სტრუქტურა:

  1. შესავალი. პირველი აბზაცი წარდგენაა: ვინ, ვისთვის და რა მიზნისთვის წერს სარეკომენდაციო წერილს. რეკომენდატორმა უნდა დაასახელოს საკუთარი სტატუსი, ასევე რა კავშირი აქვს აპლიკანტთან, რა გარემოებებში და რამდენი ხანი იცნობს მას. “ვარ X უნივერსიტეტის პროფესორი, რომელიც 2011-2012 აკადემიური წლის განმავლობაში ასწავლიდა აპლიკანტს საერთაშორისო ურთიერთობის თეორიას”.
  2. აპლიკანტის აკადემიური შესაძლებლობების თქვენეული შეფასება – ამ ნაწილს სულ მცირე ორი აბზაცი მაინც დაუთმეთ. ამ ნაწილში იწერება ის ცოდნა და უნარები, რომლებიც გამოავლინა კვლევის, სალექციო ან საველე მუშაობის დროს. შეგიძლიათ ხაზი გაუსვათ მის უცხო ენების ცოდნას, ტექნიკურ ჩვევებს, აქიურობას, ეფექტურ დებატებს. შეიძლება აღწეროთ მისი სწავლების უნარი – რამდენად კარგად გადასცემს ცოდნას სტუდენტებს (იმ შემთხვევაში თუ მას ეს გამოცდილება გააჩნია და თქვენ იცით ამის შესახებ), ან მოიხსენიოთ მისი მიღწევები, ჯილდოები სამეცნიერო კონფერენციებზე. უფრო კონრეტულად:
  • აღწერეთ აპლიკანტის გამორჩეული უნარები, მაგალითად ლიდერობის პოტენციალი, დეტალების მიმართ ყურადღება, დაინტერესება კონკრეტული კვლევის სფეროთი.
  • იყავით კონკრეტული, მოერიდეთ ზოგად ფრაზებს.
  • შეადარეთ სხვა სტუდენტებს, კოლეგებს.
  • მოიყვანეთ მაგალითები სად, რა გარემოებებში გამოიჩინა თავი, რა განსაკუთრებული მიღწევები ჰქონდა, როგორ იყო ჩართული დებატებში, კვლევებში, კონფერენციებში ან სხვა აქტივობებში.
  1. დასკვნა – სარეკომენდაციო წერილი დაასრულეთ პოზიტიურად. ასევე მიუთითეთ საკუთარი საკონტაქტო დეტალები იმ შემთხვევისთვის, თუ აპლიკანტის შესახებ დამატებითი კითხვები გაჩნდება.

დამატებითი რჩევები ეფექტური სარეკომენდაციო წერილის დასაწერად:

    • სარეკომენდაციო წერილი ფორმალური წერილია, ამიტომ სასურველია თუ იგი დაბეჭდილი იქნება ორგანიზაციის ბლანკზე. უნივერსიტეტის ონალინ სააპლიკაციო ფორმის შევსების შემთხვევაში ეს აუცილებელი არ არის, მაგრამ ზოგიერთი პროგრამა მოითხოვს ნაბეჭდი სახით გაგზავნას. ამ შემთხვევაში დაიცავით საქმიანი სტილი.
    • არ დაწეროთ მეტისმეტად მოკლე და ზერელე სარეკომენდაციო წერილი. 1-2 აბზაცი ძალიან ცოტაა აპლიკანტის შესაფასებლად, ასევე რეკომენდატორის არასერიოზულობაზეც მიუთითებს. დაწერეთ ვრცელი და ამომწურავი წერილი (სულ მცირე, 1 ნაბეჭდი გვერდი). იმ შემთხვევში თუ აპლიკანტს კარგად არ იცნობთ და ფიქრობთ რომ შეფასება გაგიჭირდებათ, ურჩიეთ მიმართოს სხვა რეკომენდატორს.
    • აპლიკანტის პირველად ხსენებისას გამოიყენეთ მისი სრული გვარი და სახელი, შემდეგ შემთხვევებში შეგიძლიათ ნაცვალსახელით, გვარით ან მხოლოდ საკუთარი სახელებით მოიხსენიოთ.
    • სარეკომენდაციო წერილი დაბეჭდეთ! ონალინ ფორმის შევსებისას ეს თავისთავად ხდება, მაგრამ იმ შემთხვევაში თუ ამობეჭდილი ვერსიაა საჭირო, აუცილებლად ბლანკზე და ნაბეჭდი სახით გაგზავნეთ! ამით რესპოდენტს თავიდან აარიდებთ ხელნაწერის გარჩევის სირთულეს.
    • ემოციური წერილი მომგებიანი არ არის, ამიტომ წერის დროს შეინარჩუნეთ აკადემიური და საქმიანი სტილი.
  • რაც მთავარია – დაწერეთ სიმართლე, სიმართლე და არაფერი სიმართლის გარდა!