განათლების საერთაშორისო ცენტრის სტიპენდია საზღვარგარეთ სწავლისათვის


განათლების საერთაშორისო ცენტრი სამთავრობო ინსტიტუტია, რომელიც გასცემს საქართველოს მოქალაქეებისთვის სრულ ან ნაწილობრივ დაფინანსებას საზღვარგარეთ სასწავლებლად სამაგისტრო და სადოქტორო პროგრამებზე, ასევე ახორციელებს კვალიფიკაციის ამაღლებისა და რიგი სხვა სტიპენდიების ადმინისტრირებას.

მაგისტრატურის დაფინანსებისათვის საბუთების შეტანა შეუძლია 35 წლამდე საქართველოს მოქალაქეს. ცენტრის მთავარი მოთხოვნაა, რომ სწავლის დამთავრების შემდეგ სტუდენტი დაბრუნდეს საქართველოში და აქ იმუშაოს შესაბამის ორგანიზაციაში 3 წლის განმავლობაში. ასე რომ თუ ქვეყანაში დაბრუნებას არ გეგმავთ, სჯობია მას არ მიმართოთ.

სააპლიკაციო პროცესი მოიცავს 3 ეტაპს:

  • საბუთების ატვირთვა ონლაინ. ცენტრის წარმომადგენლები ამოწმებენ მათ და ხარვეზის აღმოჩენის შემთხვევაში (მაგალითად, თუ რომელიმე დოკუმენტი აკლია), ცენტრის წარმომადგენელი გიგზავნით ელექტრონულ ფოსტაზე შეტყობინებას ან გირეკავთ და გთხოვთ დადგენილ ვადაში მის გამოსწორებას.
  • მეორე ეტაპზე ხდება საბუთების შინაარსობრივი შეფასება კონკრეტული კრიტერიუმების მიხედვით. დადგენილია გამსვლელი ქულა მიმართულებების მიხედვით. შეფასების კრიტერიუმები მოიცავს შემდეგს: განათლება, გამოცდილება, მოტივაცია, სამომავლო გეგმები და განაცხადის საერთო სიძლიერე.
  • მესამე ეტაპზე ხდება გასაუბრება სტიპენდიის კანდიდატებთან. ამ შემთხვევაში კანდიდატი გადის კომისიის წინაშე, რომელიც დაახლოებით 20 წუთის განმავლობაში კითხვებს უსვამს და აფასებს შემდეგი კრიტერიუმების მიხედვით: განათლება და გამოცდილება; მოტივაცია და არგუმენტაცია; პრეზენტაბელურობა; სამომავლო გეგმები; სასტიპენდიო პროგრამის მიზნებთან კონკურსანტის შესაბამისობა.
Continue reading

გასაუბრება სტიპენდიისთვის/უნივერსიტეტში ჩასარიცხად


applicaiton-interviewგასაუბრება სასტიპენდიო პროგრამებისთვის ერთ-ერთი მნიშვნელოვანი შემადგენელი ნაწილია. ხშირად ეს არის გადამწყვეტი ეტაპი – ხდება კანდიდატების შერჩევა და გაცხრილვა. ამიტომ მნიშვნელოვანია რომ მისთვის კარგად მოემზადოთ.

თქვენი მიზანი გასაუბრებისას არის საკუთარი ძლიერი მხარეების წარმოჩენა. გახსოვდეთ, რომ გასაუბრება არის დიალოგი (და არა მშრალი კითხვა-პასუხის სესია) და აბსოლუტურად თქვენზეა დამოკიდებული რას ეტყვით და რით დაამახსოვრებთ თავს გადაწყვეტილების მიმღებ პირს. თქვენ ხართ ის ადამიანი, რომელიც ყველაზე კარგად იცნობს საკუთარ თავს, იცის მისი მისწრაფებები, მიზნები და ეს უნდა გასაგებად აუხსნას დიალოგის მეორე მონაწილეს. მხოლოდ თქვენ წყვეტავთ, საკუთარი პირადი თუ პროფესიული ცხოვრების რა დეტალები და რა ფორმით მოყვეთ, როგორი ემოციები და ასოციაციები გამოიწვიოთ მსმენელში.

ზოგიერთი რჩევა:

  • ისაუბრეთ თავდაჯერებულად. თავდაჯერება საქმის ნახევარს აკეთებს 🙂 ასევე გამსაუბრებელს მიანიშნებს იმაზე, რომ დარწმუნებული ხართ საკუთარ არჩევანში, კარგად იცნობთ სფეროს და მკაფიოდ ჩამოყალიბებული მიზნები გამოძრავებთ.
  • საუბრის მანერა – ეცადეთ ისაუბროთ მშვიდად, ზომიერი ტემბრით. ეცადეთ დაფაროთ საკუთარი მღელვარება. კონცენტრაცია მოახდინეთ საუბრის შინაარსზე, ეფექტურ პრეზენტაციაზე და არა საკუთარ ემოციებზე – ეს ის შემთხვევაა, როცა ეგოიზმი უნდა დაივიწყოთ. 🙂 მოერიდეთ დიდ პაუზებს. თუ კითხვა ვერ გაიგეთ, აუცილებლად ჰკითხეთ, დააზუსტებინეთ.
  • წინასწარ მოემზადეთ გასაუბრებისათვის. ეს ნიშნავს, რომ დეტალურად შეისწავლოთ პროგრამა, უნივერსიტეტი, სასწავლო გარემო და საგნები, შეძლებისდაგვარად გაეცნოთ გამსაუბრებლის შესახებ ინფორმაციას (აბა რისთვის არსებობს საძიებო სისტემები და სოციალური ქსელები 😉 ); ასევე გააანალიზოთ საკუთარი მისწრაფებები, მიზნები, გეგმები. დაალაგოთ სათქმელი და მოემზადოთ მხოლოდ სიმართლის სასაუბროდ. გასაუბრებაზე ტყუილის თქმა არ ღირს. გაწაფული დეიდები და ბიძიები მაინც გამოგიჭერენ და ასეთ შემთხვევაში სამუდამოდ დაემშვიდობებით იმ პროგრამაში/უნივერსიტეტში ჩარიცხვის შესაძლებლობას. სხვა საქმეა ფაქტების ეფექტურად შეფუთვა და წარმოჩენა 🙂
  • ლექსიკა – დაბალანსებული, მოერიდეთ ძალიან პროფესიული ტერმინების, აბრევიატურების გამოყენებას. შეიძლება გასაუბრებას ატარებდეს ადამიანი, რომელსაც კონკრეტულ სფეროსთან შეხება არ აქვს და მხოლოდ კანდიდატის მზაობას ამოწმებს კონკრეტული პროგრამისთვის/უნივერსიტეტისთვის.
  • კითხვები – ინერვიუმდე მოამზადეთ კითხვები. ამით მათ დაანახებთ, რომ დაინტერესებული ხართ კონკრეტული პროგრამით. რა შეიძლება ჰკითხოთ? მაგალითად: თუ აქვს პროგრამას ალუმნების ქსელი? გაუგებარი დეტალები, პროგრამის სწავლების მეთოდოლოგია, საცხოვრებელი პირობები, თქვენი ვალებულებები და ა.შ. ნებისმიერი რამ, რაც მასთან დაკავშირებულია და მოცემული არ არის პროგრამის/უნივერსიტეტის ვებსაიტზე, ბუკლეტში.

business-attireქვემოთ მოცემულია შესაძლო კითხვები აკადემიური გასაუბრებისათვის. “შესაძლო” ნიშნავს, რომ ეს არის საორიენტაციო ჩამონათვალი. რეალურად გასაუბრებაზე პასუხისმგებელ პირზეა დამოკიდებული რას გკითხავთ, რას ჩაუღრმავდება, რა საკითხების ხაზგასმას მოინდომებს.

  • მოგვიყევით თქვენს შესახებ – ბევრი ორგანიზაცია/პროგრამა იწყებს გასაუბრებას ამ ბანალური კითხვით. აქ 1-2 წუთში უნდა მოახერხოთ საკუთარი თავის ეფექტურად წარმოჩენა, ძირითადი მიღწევების ხაზგასმა განათლებისა და პროფესიული განვითარების მიმართულებებით. თუ ეს სამაგისტრო პროგრამაა, არ ღირს სასკოლო გამოცდილების ხსენება (თუ ეს არ არის იმ პერიოდში დაწყებული გრძელვადიანი პროექტი, ან პირდაპირ დაკავშირებული კონკრეტულ პროგრამასთან). შეგიძლიათ ახსენოთ სამოხალისეო გამოცდილება, საკუთარი ინიციატივა, პირადი ისტორია – თუ კონკრეტულ სფეროსთან არის დაკავშირებული.
  • რატომ კონკრეტულად ეს პროგრამა და/ან ეს უნივერსიტეტი? რამ მოახდინა გავლენა თქვენს გადაწყვეტილებაზე? წარმოადგინეთ არგუმენტები და კონკრეტული მიზეზები.
  • კვლევითი პროგრამი შემთხვევაში: -რა კონკრეტულ პროექტზე გსურთ მუშაობა? რა საკითხს გამოიკვლევთ? რა კვლევით მეთოდებს გამოიყენებთ? ვისთან გსურთ მუშაობა? (აქ იგულისხმება კონკრეტული მკვლევარი/პროფესორი, რომელიც მუშაობს ამ უნივერსიტეტისთვის ან პროგრამისთვის).
  • ბოლოს რა წიგნი წაიკითხეთ? მერე რა, რომ მსოფლიო კლასიკოსები შეიძლება გქონეთ წაკითხული. ამ შემთხვევაში უნდა დაასახელოთ აკადემიური გამოცემა თქვენს მიერ არჩეულ სფეროში.
  • ამ სფეროში რომელ ავტორებს იცნობთ? უნდა ახსენოთ ისევ პროფესიასთან დაკავშირებული პუბლიკაციები და ავტორები.
  • თქვენი განათლებისა და სამუშაო ისტორიიდან გამომდინარე კონკრეტული კითხვები: – ამჟამად სად მუშაობთ? რა შედის თქვენს მოვალეობებში? რა ინიციატივები გაქვთ განხორციელებული? რამდენი ხანია რაც მანდ მუშაობთ და რა მოგწონთ ან არ მოგწონთ თქვენს სამუშაოში? რა არის ყველაზე დიდი გამოწვევა? ბოლოს რა პროექტი განახორციელეთ? გყავთ თუ არა ადგილობრივი ან საერთაშორისო პარტნიორები? არასამთავრობო ორგანიზაციის შემთხვევაში – რომელი დონორებისგან გაქვთ დაფინანსება მიღებული? ასევე – დეტალები კონკრეტული პროექტის/ინიციატივის შესახებ: ვინ მონაწილეობდა? რამდენი ადამიანი? რა შედეგებს მიაღწიეთ? რა პრობლემებს ხედავ და შენი აზრით, როგორ შეიძლება მათი ეფექტურად მოგვარება?

საყურადღებო დეტალები (არსებობის შემთხვევაში):

  • ახსენეთ ლიდერობის გამოცდილება – მაგალთად, საკუთარი ინიციატივით განხორციელებული კონკრეტული ღონისძიება, იქნება ეს ერთჯერადი თუ გრძელვადიანი პროგრამა. ან როგორ მიიღეთ მონაწილეობა მნიშვნელოვანი პროგრამის ჩამოყალიბებაში/განხორციელებაში.
  • ახსენეთ პარტიორობა და თანამშრომლობა სფეროს ექსპერტებთან, ორგანიზაციებთან.
  • დაანახეთ მომავლის კონკრეტული ხედვა და ცვლილებისათვის მზაობა – რა გურთ აკეთოთ საშუალოვადიან და გრძელვადიან პერსპექტივაში.

წარმატებას გისურვებთ.

გამგზავრებამდე საჭირო ინფორმაცია


Scholarship საზღვარგარეთ სასწავლებლად გამგზავრებამდე მთელი რიგი ინფორმაციის მოძიებაა აუცილებელი. ზარმაცი ადამიანის ლოგიკა – “ჩავალ და ადგილზე გავარკვევ” – ამ შემთხვევაში უნდა დაივიწყოთ: ჩასვლის შემდეგ ისედაც ბევრი მოსაგვარებელი დეტალი გამოხტება, ასევე შეიძლება იყოს კულტურული შოკი, ათასი ნამდვილი და მოგონილი მიზეზი, რომელიც საქმის კეთებაში ხელს შეგიშლით. როდესაც არსებობს ინტერნეტი, სავსებით შესაძლებელია მაქსიმალური ინფორმაციის მოძიება და გარკვევა რიგი მნიშვნელოვანი საკითხების შესახებ. კერძოდ:  Continue reading

TOEFL iBT თუ EILTS?


TOEFL და IELTS ინგლისური ენის ორი საერთაშორისო აკადემიური ტესტია, რომელთა შედეგებსაც აღიარებენ უცხოეთის უნივერსიტეტები. ორივე ტესტს ერთი და იგივე დანიშნულება აქვს და ხშირად საზღვარგარეთ სწავლის მსურველები კითხულობენ თუ რომელი სჯობია.

TOEFL ამერიკული ტესტია, IELTS – ბრიტანული. ისინი სტრუქტურულად ერთმანეთის მსგავსია (მოიცავს მოსმენის, წერის, კითხვისა და საუბრის კომპონენტებს), თუმცა შიდა აგებულება და სპეციფიკა განსხვავებული აქვთ,.

უფრო დაწვრილებით ტოეფელის სტრუქტურის შესახებ: TOEFL iBT  სტრუქტურა

IELTS-ის სტრუქტურის შესახებ: IELTS სტრუქტურა

დანარჩენ განსხვავებებს რაც შეეხება:  Continue reading

როდის დავიწყოთ საზღვარგარეთ სწავლისათვის მომზადება


 “საბუთების გაგზავნა ვერ მოვასწარი”, – ეს გულდაწყვეტილი ფრაზა ხშირად მომისმენია საზღვარგარეთ სწავლის მსურველებისგან. “ტესტის შედეგი დედლაინის მერე იქნება და რა ვქნა?” – კითხულობენ სხვები. “მოასწრებს უნივერსიტეტი დოკუმენტების მიღებას?” – კიდევ ვიღაც წუხს. ბევრი ვერ ხვდება სასურველ სასწავლებელში მხოლოდ იმიტომ, რომ დროულად ვერ მოასწრო ყველაფრის მომზადება.

რა დრო სჭირდება საზღვარგარეთ სწავლის დაგეგმვასა და წასვლას? ეს ხანგრძლივი პროცესია. ცდებით, თუ გგონიათ, რომ 2-3 კვირაში ყველა საბუთს გააკეთებთ და ვიზას აიღებთ. ეს არარეალური დროა. მთელ პროცესს, ხარისხიანი შედეგის მისაღწევად, საშუალოდ 12-18 თვე სჭირდება. რატომ ამდენი?  Continue reading

FLEX 2014 გამოცხადდა


მომავალ ლიდერთა გაცვლითი პროგრამა (FLEX)  სკოლის (15-17 წლის)  მოსწავლეებს სთავაზობს  შესაძლებლობას გაეცნონ ამერიკის კულტურას და ხალხს საერთაშორისო გაცვლითი პროგრამის მეშვეობით, ისწავლონ ამერიკულ სკოლაში და იცხოვრონ ამერიკელ მასპინძელ ოჯახთან ერთად ერთი აკადემიური წლის მანძილზე.

მომავალ ლიდერთა გაცვლითი პროგრამა (FLEX)  არის ყოფილი საბჭოთა კავშირის 10 ქვეყნის, მათ შორის საქართველოს, ზოგადსაგანმანათლებლო სკოლების მოსწავლეთათვის განკუთვნილი გაცვლითი პროგრამა, რომელიც სრულად ფინანსდება აშშ-ს სახელმწიფო დეპარტამენტის მიერ. FLEX პროგრამის უპირველესი მიზანია, ამ ორი ქვეყნის ახალგაზრდებს შორის გააღრმავოს ურთიერთგაგება, რაც საშულებას აძლევს ახალგაზრდებს დააკვირდნენ და გამოცდილებაზე დაყრდნობით შეისწავლონ აშშ–ს მთავრობის სისტემა, ამერიკული ცხოვრების სტილი, სამოქალაქო საზოგადოების ჩართულობა და სხვა.

პროგრამას სრულად აფინანსებს აშშ-ს სახელმწიფო დეპარტამენტის განათლებისა და კულტურის საკითხთა ბიურო. FLEX და სხვა გაცვლითი პროგრამების მხარდაჭერის გზით, აშშ-ს სახელმწიფო დეპარტამენტი ხელს უწყობს შეერთებულ შტატებსა და მსოფლიოს სხვა ხალხებს შორის ურთიერთგაგების გაღრმავებას.

უკვე ოცდამეერთე წლიწადია რაც FLEX-ის გაცვლითმა პროგრამა დაფინანსება გაუწია 23, 000 საშუალო სკოლის მოსწავლეებს. 2013 წელს 14,800 სტუდენტი ჩაირიცხა ამერიკაში FLEX-ის პროგრამის ფარგლებში და მათ შორის 45 ქართველო.

საშუალო სკოლის შეზღუდული შესაძლებლობის მქონე მოსწავლეები ასევე იღებენ მონაწილეობას პროგრამაში. დაახლოებით 10-15 შეზღუდული შესაძლებლობის მქონე მოსწავლე მიემგზავრება შტატებში ამ პროგრამის ფარგლებში ყოველწლიურად.

ვის შეუძლია მონაწილეობის მიღება?

თითოეული მოსწავლეს, რომელიც აკმაყოფილებს პროგრამის მოთხოვნებს შეუძლია შესარჩევ ტურებში მონაწილეობის მიღება.

მოსწავლეები უნდა იყვნენ:

1) მე-9, მე-10 და მე-11 კლასის მოსწავლეები,

2) დაბადებული 1997 წლის 1 იანვრიდან 1999 წლის 16 ივლისამდე

3) კარგი ან საუკეთესო აკადემიური მოსწრების მქონე

4) აკმაყოფილებენ ამერიკის ვიზის მოთხოვნებს

5) ფლობენ ინგლისურ ენას

6) საქართველოს მოქალაქეები რომელთაც შეეძლებათ საქართველოს პასპორტის მიღება

უნარშეზღუდული მოსწავლეები უნდა აკმაყოფილებდნენ შემდეგ კრიტერიუმებს

  • მოსწავლე უნდა იყოს 8, 9, 10, 11 ან 12 კლასში
  • დაბადებული  1996 წლის 1 მარტიდან 1999 წლის 15 ივლისის ჩათვლით.
  • კარგი ან საუკეთესო აკადემიური მოსწრების მქონე
  • აკმაყოფილებენ ამერიკის ვიზის მოთხოვნებს
  • ფლობენ ინგლისურ ენას
  • საქართველოს მოქალაქეები რომელთაც შეეძლებათ საქართველოს პასპორტის მიღება

 

კონკურსანტებს შეუძლიათ ტესტირების ერთერთ ცენტრში ჩაბარება. მათ თან უნდა იქონიონ:

1) დაბადების მოწმობა/პირადობა,

2) ერთი ცალი 3X4–ზე გადაღებული ფოტოსურათი

3) საწერკალამი.

”FLEX” პროგრამაში მონაწილეობის მისაღებად ჩვენ ვიწვევთ ყველა უფროსკლასელს, რომელიც აკმაყოფილებს პროგრამის კრიტერიუმებს, მათ შორის შეზღუდული შესაძლებლობის მქონე მოსწავლეებს. ასაკობრივი და სასკოლო კრიტერიუმი ასეთი პირებისათვის განსხვავებულია: მე-8, მე-9, მე-10, მე-11 და მე-12 კლასის- 1996 წლის 15 მარტიდან 1999 წლის 16 ივლისამდე.

კონკურსი შედგება სამი რაუნდისაგან:

რაუნდი 1: ინგლისურის მოკლე ტესტი

რაუნდი 2: თემები ინგლისურად

რაუნდი 3: ინგლისურის სტანდარტული ტესტი, თემები, აპლიკაცია და ინტერვიუ

მოსწავლეებს წელიწადში მხოლოდ ერთხელ შეუძლიათ კონკურსში მონაწილეობის მიღება.

 

FLEX პროგრამა ფარავს შემდეგ ხარჯებს:

  • მგზავრობის ორივე გზა იფარება სრულად (საკუთარი ქვეყნიდან შეერთებულ შტატებამდე და უკან);
  • ყოველთვიური სტიპენდია, რომელიც ეხმარება სტუდენტს ჩაერთოს აქტივობებში ადგილობრივ  დონეზე და აგრეთვე შეიძინოს საჭირო  პირადი ნივთები;
  • მასპინძელი ოჯახები;
  • ამერიკის საჯარო სკოლებში ჩარიცხვა;
  • პროგრამის ტრენინგების ხარჯები, გაფრენის და ჩამოსვლის შემდგომი ორიენტაციები.
  • ადგილობრივ დონეზე ორგანიზებული პროგრამის აქტივობები
  • ჯანმრთელობის დაზღვევა (მანამდე არსებული დაავადებების და სტომატოლოგიური მომსახურების გამოკლებით)

ვინ უწევს პროგრამას ორგანიზებას?

საერთაშორისო განათლების ამერიკული საბჭოები, რომელიც არის საერთაშორისო ორგანიზაცია, უკვე 30 წელია არსებობს. იგი აკავშირებს ამერიკას დასავლეთ ევროპასთან, ევრაზიასთან და ბალკანეთის ქვეყნებთან. ამერიკული საბჭოები ადმინისტრირებას უწევს 30 გაცვლით პროგრამას, ტრენინგ კურსს საშუალო სკოლის მოსწავლეების და მასწავლებლებისათვის, უნივერსიტეტის სტუდენტების და პროფესორებისთვის. ACTR/ACCELS უზრუნველყოფენ 20 FLEX ოფისის კოორდინირებას ევრაზიის მასშტაბით, რომლებიც ხელმძღვანელობენ ტესტირებას, შერჩევის პროცესს, ფინალისტებთან კომუნიკაციას, დოკუმენტების მომზადებას, წინაგასამგზავრებელ ორიენტაციას, მონაწილეების ტრანსპორტირებას და ინფორმაციის უწყევეტად და ეფექტურად მიწოდებას. ამერიკული საბჭოები არის დამაკავშირებელი კვანძი მონაწილეების ოჯახს, ამერიკულ სკოლას და მასპინძელ ოჯახის შორის, მაშინ, როცა მომავალი ლიდერები იღრმავებენ ცოდნას და იძენენ გამოცდილებას შტატებში.

ორგანიზაცია ასევე კოორდინირებას უწევს FLEX პროგრამის კურსდათავრებულების ღონისძიებებს.  კურსდამთავრებულთა რესურს ცენტრი არის მიმართულება, სადაც სტუდენტებს აქვთ შანსი პრაქტიკულად გამოიყენონ თავიანთი ცოდნა და გამოცდილება. მათ მიერ განხორციელებული ღონისძიებების შესახებ ამერიკის შტატების დეპარტამენტი ღებულობს თვიურ ანგარიშს.

ვინ აფინანსებს პროგრამას?

ეს პროგრამა სრულად ფინანსდება ამერიკის სახელმწიფო დეპარტამენტის მიერ და მას ადმინისტრირებას უწევს განათლებისა და კულტურის საქმეთა ბიურო. ეს ბიურო ხელს უწყობს ამერიკელ ხალხსა და სხვა ქვეყნებს შორის ურთიერთგაგების დამყარებას.

ამ ბიუროს პროგრამები მოიცავს საგანმანათლებლო და ტრენინგ პროგრამებს, რომელიც მხარს უჭერს პიროვნული, პროფესიული და ინსტიტუციონალური ჯაჭვის გამყარებას ამერიკის მოქალაქეებსა და ორგანიზაციებს შორის განათლების და კულტურული გაცვლითი ურთიერთობებითა და შესაძლებლობებით.

პროგრამის მონაწილეები  მიემგზავრენიან ამერიკის შეერთებულ შტატებში J-1 ვიზის მეშვეობით, რომელიც შექმნილია გაცვლითი პროგრამის ვიზიტორებისათვის. იმიტომ რომ, პროგრამა ფინანსდება ამერიკის მთავრობის მიერ, არსებობს 2 წლიანი სამშობლოში დარჩენის მოთხოვნა და მონაწილეები ვალდებული არიან დაბრუნდნენ სამშობლოში პროგრამის დასრულების შემდგომ. დამატებითი დეტალები შესაძლოა იხილოთ აქ:  http://j1visa.state.gov/.

ტესტირების განრიგი

 

ქალაქი თარიღი სკოლა/მისამართი
გორი 18 სექტ, 2013.10:00სთ საჯარო სკოლა #3,დ. ამილახვრის #26
მარნეული 23 სექტ, 2013.10:00სთ საჯარო სკოლა #5,რუსთაველის #52
თელავი 25 სექტ, 2013.10:00სთ საჯარო სკოლა #7,ალაზანის გამზ #22
ქუთაისი 28 სექტ, 2013.10:00სთ საჯარო სკოლა #3,წმინდა ნინოს #2
ზუგდიდი 30 სექტ, 2013.10:00სთ საჯარო სკოლა #1,აღმაშენებლის #1
ბათუმი ოქტ, 2013.10:00სთ საჯარო სკოლა #8,გრიბოედოვის #35
ბორჯომი ოქტ, 2013.10:00სთ საჯარო სკოლა #1,წმინდა ნინოს #2
ახალციხე 10 ოქტ, 2013.10:00სთ საჯარო სკოლა #1,მიქუტიშვილის #2
თბილისი 19 ოქტ, 2013.10:00სთ გამოცხადდება სექტემბრის ბოლო რიცხვებში
შეზღუდული შესაძლებლობის მქონე მოსწავლეთათვის 22 ოქტ, 2013წ.11:00სთ ამერიკული საბჭოების ოფისიჭავჭავაძის გამზირი 35ა, მე-2 სართული, თბილისი

დამატებითი ინფორმაციისთვის ან კითხვების შემთხვევაში დაუკავშირდით:

საერთაშორისო განათლების ამერიკული საბჭოების წარმომადგენლობა საქართველოში

მისამართი: ჭავჭავაძის გამზირი, 35ა, მე-2 სართული

თბილისი 0162, საქართველო

ტელეფონი: (+995 32) 229 21 06; (+995 32) 291 32 52

ფაქსი: (+995 32) 225 21 07

ელფოსტა: info@amcouncils.ge

თურქეთის მთავრობის სტიპენდია


თუ გსურთ უახლესი ინფორმაციის მიღება სხვადასხვა სტიპენდიის, გაცვლითი პროგრამებისა და დაფინანსების წყაროების შესახებ, ასევე პრაქტიკული რჩევები სამოტივაციო წერილის დასაწერად, დაესწარით ტრენინგს.

————————–

თურქეთის მთავრობის სტიპენდია მაგისტრატურისა და დოქტორანტურისათვის მოიცავს სპეციალობების ფართო სპექტრს, მათ შორის ინჟინერიასა და ტექნოლოგიას, ასევე სოციალურ მეცნიერებებს.

პროგრამა განკუთვნილია საეTurkey Graduate Scholarship Program for International Studentsრთაშორისო სტუდენტებისათვის, რომლბიც თურქეთის უნივერსიტეტებში სწავლობენ.

სტიპენდიის კანდიდატი უნდა აკმაყოფილებდეს შემდეგ მოთხოვნებს:

– უნდა ჰქონდეს დამთავრებული, ან ამთავრებეს საგანმანათლებლო დაწესებულებას, რომელიც თურქეთში არსებულის ეკვივალებტია (მაგალითად, ბაკალავრიატს – მაგისტრატურაში სასწავლებლად)

– უნდა შეესაბამებოდნენ შემდეგ ასაკობრივ ზღვარს: მაგისტრატურაში სწავლის მსურველი დაბადებული უნდა იყოს არა უადრეს 01.01.1983-ისა, დოქტორანტურაში სწავლის მსურველი – 01.01.1978-ისა.

– უნდააკმაყფილებდნენ აკადემიური ქულების მინიმუმს, კონკრეტულს თითოეული პროგრამისათვის.

– სტუდენტებს, რომლებიც უკვე სწავლობენ თურქეთში, არ შეუძლიათ განაცადი შეიტანონ იმავე დონის სწავლის დაფინანსებისათვის.

– თირქეთის მოქალაქეებს, ან მათ, ვინც დაკარგეს თურქეთის მოქალაქეობა, არ შეუძლიათ სტიპენდიაზე განაცხადის შეტანა.

სტიპენდიის პროგრამა განკუთვნილია ნებისმიერი ქვეყნის მოქალაქისათვის, რომელიც ამ პირობებს აკმაყოფილებს.

სტიპენდიის ხანგრძლივობა:

სტიპენდიის ხანგრძლოვობა მოიცავს (მაგისტრატურისა და დოქტორანტურისათვის): 1 წლიან თურქული ენის კურსს + 1 წლიანი სამეცნიერო მომზადება (აუცილებლობის შემთხვევაში) + განათლების ხანგრძლივობა.

რას ფარავს სტიპენდია:

თურქეთის მთავრობის სტიპენდია მოიცავს შემდეგ დანახარჯებს:

– ყოველთვიური თანხა: მაგისტრატურის სტუდენტებისთვის $423,75, დოქტორანტურის სტუდენტებისთვის – $565.

– საცხოვრებელს: სტიპენდიანტებს შეუძლიათ იცხოვრონ სახელმწიფო უნივერსიტეტების საერთო საცხოვრებელში უფასოდ. სტუდენტებს, ვისაც არ სურთ ამ საცხოვრებელში დარჩენა, შეუძლიათ მონახონ სხვა საცხოვრებელი საკუთარი ხარჯებით.

– სწავლის გადასახადები: თურქეთის მთავრობის სტუპენდიანტები არ იხდიან სწავლის გადასახადს.

– ჯანმრთელობა: თურქეთის მთავრობის სტიპენდიანტებს გააჩნიათ სახელმწიფო დაზღვევა.

თურქული ენის კურსები: თურქეთის მთავრობის სტიპენდიანტები ერტი წლის განმავლობაშჲ ესწრებიან თურქული ენის კურსებს, თუ არ გააჩნიათ თურქული ენის დამადასტურებელი საბუთი. სტიპენდიანტები, რომლებიც თურქულის გარდა სხვა ენაზე სწავლობენ, ასევე უნდა დაესწრონ თურქული ენის კურსებს.

– ტრანპორტირება: სტიპენდიანტები მიიღებენ გარკვეულ თანხას თურქეთში ჩამოსასვლელად და გასამზავრებლად სწავლის დამთავრების შემდეგ.

შერჩევის კრიტერიუმები:

კანდიდატების შერჩევა ხდება აკადემიური მიღწევებისა და ინტერვიუს საფუძველზე.

აკადემიური წარმატება იზომება შემდეგი დოკუმენტების მიხედვიტ: დიპლომის შეფასება, უკანასკნელ სემესტრამდე მიღებული ზოგადი საშუალო ნიშნები, უნივერსიტეტში ჩასაბარებელი გამოცდები (თუ ასეთი არსებობს), საშუალო სკოლის დამამთავრებელი გამოცდა/ბაკალავრიატის შეფასება (თუ ასეთი არსებობს), საერთაშორისო ტესტების ქეულები (არსებობის შემთხვებაშჲ) და სხვა აკადემიური შეფასების ქულები.

– საერთო GPA, კანდიდატებს სამაგისტრო და სადოქტორო პროგრამებისთვის უნდა გააჩნდეთ მაღალი შეფასებები, (სამაგისტრო და სადოქტოროსთვის 75%, სამედიცინოზე 90%).

წარმატებული კანდიდატები გაივლიან ონალინ ინტერვიუს. ინფორმაციას ინტერიუს შესახებ მიიღებენ ელ-ფოსტის საშუალებით. შერჩეული სტუდენტები მიიღებენ სტიპენდიას.

საბუთების შეტანა:

კანდიდატებმა აპლიკაცია უნდა გაგზავნონ ვებსაიტის საშუალებით.

2013 წლის აპლიკაციის დედლაინი იყო 31 მარტს.

 

მიღება ვესტ პოინტის სამხედრო აკადემიაში


ერთ-ერთ კომენტარში მკითხველმა მთხოვა დამეწერა ვესტ-პოინტის სამხედრო აკადემიაში მიღების პროცედურების შესახებ.  აკადემიის ვებსაიტზე გამოქვეყნებულია მოთხოვნები, რომელსაც უნდა შეესაბამებოდეს ჩაბარების მსურველი ამერიკის მოქალაქე თუ უცხოელი.

საერთაშორისო სტუდენტი, რომელსაც ვესტ-პოინტში სწავლა სურს, შემდეგ კრიტერიუმებს უნდა აკმაყოფილებდეს:

  1. ასაკობრივი ზღვარი – 17-დან 23 წლამდე (უცხოელებისთვის ზედა ზღვარი 22 წელია)
  2. არ უნდა იყოს დაქორწინებული
  3. არ უნდა იყოს ფეხმძიმედ ან გააჩნდეს ბავშვის შენახვის კანონის მიერ დაკისრებული ვალდებულება.

ამ კრიტერიუმების დაკმაყოფლების შემდეგ უნდა შეივსოს კანდიდატის კითხვარი. იგი შეიცავს დამატებით კითხვებს, ფორმებსა და ინსტრუქციებს.

აკადემიური მოთხოვნები:

ვესტ პოინტში სწავლის დაწყვების მსურველს უნდა ჰქონდეს სასკოლო ან კოლეჯის ნიშნები საშუალოზე მაღალი. მან სხვა საბუთებთან ერთად ვესტ პოინტში უნდა გაგზავნოს ნიშნების ფურცელიც.

გარდა ამისა, მან უნდა ჩააბაროს CAT ან SAT ტესტების შედეგებიც.

სამედიცინო მოთხოვნები: კანდიდატი უნდა იყოს ფიზიკურად და ფსიქოლოგიურად ჯანმრთელი, და გაიაროს თავდაცვის დეპარტამენტის სამედიცინო შემოწმება. სამედიცინო სტანდარტები უფრო დაწვრილებით მოცემულია ვესტ-პოინტის  ბიულეტენში.

ქალი კადეტები – იგივე კრიტერიუმებს უნდა აკმაყოფილებდნენ რასაც მამაკაცები იქნება ეს აკადემიური, ლიდერობის თუ სამხედრო განვითარება. გამონაკლისები არ დაიშვება.

შესაძლებლობები უმცირესობის წარმომადგენელბისათვის – ვესტ პოინტი ღიაა ნებისმიერი სტუდენტისათვის. უმცირესობისათვი არ არის ცალკე მიღებები, ნომინაციეი და ა.შ. მაგრამ აპლიკანტის შეფასებისას ყურადღება ექცევა მის კულტურულ, სოციალ-ეკონომიკურ კუთვნილებასაც. ვესტ პოინტი ახდენს უმცირესობების ინფორმირებას ჩაბარების შესაძლებლობის შესახებ (შეერთებულ შტატებში). ეს ის კატეგორიაა, ვინც დამოუკიდებლად ვერ მიიღებდა ამ ინფორმაციას ად ვერ ჩააბარებდა. დღესდღეობით ვესტ პოინტში უმცირესობები  შეადგენენ კადეტთა კორპუსის 15-20%.

საერთაშორისო კადეტები

ვესტ-პოინტი, როგორც მსოფლიო კლასის საგანმანათლებლო დაწესებულება, მიესალმება სხვადასხვა წარმოშობისა და გამოცდილების მქონე კადეტებს. იგი უზრუნველყოფს მათალი ხარისხის განვითარებას ინტელექტუალურად, სამხედრო და ფიზიკური თვალსაზრისით;  ასევე ყურადღება ექცევა ეთიკურ და მორალურ განვითარებასაც. სწავლება 4 წლიანია.

ვესტ პოიტში აპლიკაციის გაგზავნისათვის უნდა მიმართოთ შეერთებული შტატების თავდაცვის ატაშეს თქვენი ქვეყნის საელჩოში. ეს ოფისი არის დამაკავშირებელი რგოლი სტუდეტნტს, მასპონძელ ერსა და ვესტ პოინტის სამხედრო აკადემიას შორის.

ვესტ პოინტში არ არის საბუთების მიღების დედლაინი, მათ გააჩნიათ  მოძრავი/მცოცავი მიღების პოლიტიკა. რაც უფრო ადრე გაგზავნით საბუთებს, მით უფრო ადრე შეგატყობინებენ გადაწყვეტილებას მიღების შესახევ. აკადემია აპლიკანტებისთვის  შეტყობინებების გზავნას იწყებს ნოემბრიდან, ოფერების უმეტესობას აგზავნის აპრილის შუა რიცხვებიდან.

ვესტ პოინტში სწავლების მსურველი უცხოელები დამატებით უნდა აკმაყოფილებდნენ შემდეგ კრიტერიუმებს:

– დაფინანსებული იყვნენ ეროვნული დონის მთავრობის წარმომადგნლისგან

– იყვნენ 17-22 წლის- არ იყვნენ დაქორწინებული ან ფეხმძიმე, ან ჰქონდეთ ბავშვის შენახვის კანონიერი ვალდებულება.

ვესტ პოინტში 60-მდე უცხოელი კადეტი სწავლობს. გაგზავნის უფლების მქონე ქვეყნების ჩამონათვალს ყოველწლიურად განსაზღვრავს შეერთებული შტატების სახელმწფო დეპარტამენტი და შეერთებული შტატების თავდაცვის დეპარტამენტი. ამერიკის საელჩოები ატყობინებენ მოწვეულ ერებს/ქვეყნებს რომ დაასახელონ თითოეული ქვეყნიდან 6 კანდიდატი ვესტ პოინტში სასწავლებლად.

რა უნდა გაითვალისწინოთ აპლიკაციების შევსებისას


2 დღის წინ ჩემი ორგანიზაციის სახელით უფასო ონლაინ კურსი გამოვაცხადე. ამ პერიოდში უკვე 50-მდე აპლიკაცია შემოვიდა. აპლიკაციების მიღების ბოლო ვადა 21 აპრილია, ალბათ კიდევ შეავსებს ჩვენს ონლაინ ფორმას. თუმცა უკვე ვკითხულობ გამოგზავნილ მასალებს და არ ვიცი ვიცინო თუ გამიხარდეს ☺ სააპლიკაციო პროცესი საკმაოდ რთული და შრომატევადია. უნდა გქონდეს კონკრეტული კრიტერიუმები, რომლის მიხედვითაც შეაფასებ აპლიკანტებს. ამ შემთხვევაში, რადგან საქმე სამშვიდობო აქტივიზმს ეხება, მნიშვნელოვანი იქნება გარკვეული კავშირი ამ სფეროსთან, მოტივაცია და რესურსები – თუ რამდენად აქვს მიღებული ცოდნის გამოყენების პერსპექტივა აპლიკანტს. მინდა, რომ ეს კურსი მხოლოდ კურსად არ დარჩეს, სტუდენტებმა შეძლონ კონკრეტული სამშვიდობო სტრატეგიების შემუშავება და განხორციელება.

მანამ, სანამ მასალების გამოქვეყნებას და მუშაობას დავიწყებ, აპლიკაციები მაქვს დასახარისხებელი. ასარჩევია 20 სტუდენტი, რომელიც 5 კვირის განმავლობაში (29 აპრილი – 2 ივნისი) გაეცნობა ორგანიზაციის ბლოგზე დადებულ მასალებს და შეასრულებს დავალებებს. საიდუმლოდ გაგიმხელთ, რომ ეს იქნება დაცული მასალები და მხოლოდ შესაბამისი პაროლის გამოყენების შემთხვევაში იქნება შესაძლებელი მათი გაცნობა. მომავალში, თუ საგანმანათლებლო პლატფორმის შეძენას მოვახერხებთ (რაც, სხვათა შორის, საკმაოდ დიდი ფუფუნებაა), უფრო დახვეწილი ბაზა გვექნება ონლაინ კურსებისათვის.

მანამდე კი გაგაცნობთ რამდენიმე რჩევას, რაც აუცილებლად უნდა გაითვალისწინოთ ნებისმიერ სააპლიკაციო პროცესში.

1. სრულად და კონკრეტულად გაეცით პასუხი ყველა კითხვას. როდესაც არის მოთხოვნა რომ დაიწეროს 100-150 სიტყვა რაღაც საკითხის შესახებ, აუცილებლად შეასრულეთ იგი. აქ “ცოტა, მაგრამ ხარისხიანი” ლოგიკა გამოუსადეგარია. ეს ეხება არა მხოლოდ მოტივაციას. შესაძლოა აპლიკაცია მოითხოვდეს საკუთარი აზრის გამოთქმას სპეციფიკური საკითხის შესახებ, ან ბიოგრაფიის კონკრეტული ნაწილის მოყოლას. თუ პროგრამით მართლა დაინტერესებული ხართ, ნუ დაიზარებთ “ზედმეტ” შრომას. რამდენიმე აპლიკაციაში 2-3 წინადადებიანი მოტივაცია მოვიდა. რა თქმა უნდა, ისინი ჩემს კურსში ვერ ჩაერთვებიან.

2. როდესაც მოტივაციაზე ფიქრობთ, იყავით რაც შეიძლება კონრეტული და რეალური. კონცენტრირდით იმაზე, თუ რას მოითხოვს საკონკურსო კომისია და ამ საკითხთან დაკავშირებით კონკრეტულად რისი გაკეთება გსურთ თქვენ. არიან ადამიანები, რომლებიც ქვეყნის გადარჩენის გეგმებზე საუბრობენ მოტივაციაში. ამასთანავე, მათ აქვთ ბაკალავრის ან არასრული უმაღლესი განათლება და ძალიან მცირე სამუშაო გამოცდილება. სხვა სიტყვებით რომ ვთქვათ, მათ ქვეყანაში გლობალური ცვლილებების მოხდენისთვის რესურსი არ გააჩნიათ. გარდა ამისა, კარგად არ აქვთ გააზრებული თავიანთი როლი საზოგადოებრივ ცხოვრებაში. რომ წერდნენ კონკრეტული ახალგაზრდული, რელიგიური ან ეთნიკური ჯგუფის ინტერესების დაცვაზე, უფრო დამაჯერებელი იქნებოდა.

3. ენა – ყურადღება მიაქციეთ რა არის კომუნიკაციისა და სასწავლო ენა. ეს-ესაა ერთმა თურქულად შეავსო ონლაინ აპლიკაცია. ინგლისური ენის ცოდნაში სუსტი მიუთითა. რა აზრი აქვს მის მიღებას? არც არაფერი. მე თავს არ შევიწუხებ რომ გუგლს ვათარგმნინო მისი მოწერილი, მისი ენის ბარიერი კი მასალების გაცნობის, სხვა სტუდენტებთან ურთიერთობის საშუალებას არ მისცემს.

4. შესაბამისობა – აპლიკაციის შევსებისას მნისვნელოვანია, თუ რამდენად რელევანტური განათლება და გამოცდილება გაქვთ. რამდენიმე ისეთმა ადამიანმა გამოგზავნა ახლა მონაცემები, რომელსაც მშვიდობის მშენებლობასთან საერთოდ არ აქვთ შეხება. ზოგი ბიზნეს ადმინისტრირებას სწავლობს, ზოგი გარემოს დაცვას, ტექნიკურ მეცნიერებებს და ა.შ. მსგავსი კანდიდატები კურსისათვის ბალასტია. ისინი ვერასოდეს გადავლენ მეორე ეტაპზე. იმიტომ, რომ ორიენტაცია კონკრეტულ სფეროზეა.

5. თითოეული კონკურსისთვის აპლიკაციები შეავსეთ დამოუკიდებლად. არასოდეს, არასოდეს დააკოპიროთ მოტივაცია ან სხვა მასალა ერთი აპლიკაციიდან მეორეში. ყველა კურსი, პროგრამა თავისი შინაარსით განსხვავდება. ამიტომ თითოეული მათგანისთვის უნდა გაითვალისწინოთ განსხვავებული დეტალები. უკვე რამდენიმე ადამიანზე მივხვდი რომ საიდანღაც აღებული ტექსტი ჩასვეს. ასეთებს დაუნანებლად ვბრაკავ. თუ ადამიანს არ უნდა, რომ ამ კურსის მარტივი აპლიკაციის შევსებაზე დრო დახარჯოს, არც მე მემეტება მისთვის რესურსი.

 გაითვალისწინეთ, რომ თუნდაც უფასო და ძალიან მარტივი კურსებისთვის საკმაოდ დიდი რესურსი იხარჯება. აბსოლუტურად ყველაფერს აქვს დანახარჯი, თუნდაც დროის სახით. გარდა ამისა, არის  საკომუნიკაციო, ინტერნეტის, ინსტრუქტორის ხელფასის და ა.შ. ხარჯები, რამაც ეს კურსი ან პროგრამა თქვენამდე მოიტანა. ლოგიკურად დაასკვნით, რომ რეალურად ეს ყველაფერი საკმაოდ ძვირადღირებულია. ასე რომ თუ მონაწილეობა მხოლოდ მონაწილეობისთვის გჭირდებათ და მიღებულ სიკეთეებს არ/ვერ გამოიყენებთ, დაზოგეთ სხვისი დრო და ნერვები. არ შეავსოთ ეს აპლიკაცია!

პ.ს. თუ ხართ 18-35, იცით ინგლისური, შეგიძლიათ კვირაში დაახლოებით 2 საათი დაუთმოთ კურსს და ყველაფერი ზემოთჩამოთვლილის შემდეგ მაინც მოგინდათ გაიგოთ მეტი სამშვიდობო აქტივიზმის შესახებ, შეავსეთ ონალინ აპლიკაცია 21 აპრილამდე.

წარმატებას გისურვებთ ☺

Toefl iBT-ისთვის ონლაინ რეგისტრაცია


როგორც ერთ-ერთ წინა პოსტში ვწერდი, ტოეფელის გამოცდისათვის რეგისტრაცია რამდენიმე გზით ხდება: ფოსტის საშუალებით, ტელეფონით, ან ტოეფელის ცენტრში ან ონლაინ სააპლიკაციო ფორმის საშუალებით. ჩემთვის ყველაზე სწრაფი და მარტივი გზა ეს უკანასკნელია.

რა გჭირდებათ ონლაინ რეგისტრაციისთვის:

  • ინტერნეტში ჩართული კომპიუტერი
  • 160$ საკრედიტო ბარათის ანგარიშზე. შეიძლება ნებისმიერი ბარათის გამოყენება, რომელსაც მოქმედების ვადა ჯერ არ გასვლია. მათ შორის ვიზა კლასიკი ან ვიზა ელექტრონი.
  •  მცირე დრო: დაახლოებით 3-5 წუთი.

ტოეფელის გამოცდისათვის სააპლიკაციო ფორმა ივსება ინგლისურ ენაზე, ლათინური ასოებით.

ონლაინ რეგისტრაცია შესაძლებელია მხოლოდ ტოეფელის ოფიციალურ საიტზე და სხვაგან არსად. თუ ვინმე სხვაგან გადაგამისამართათ, არ დაუჯეროთ. ასევე არ ენდოთ მათ, ვინც გეტყვით, რომ ეს ფასიანი სერვისია. ზოგჯერ ამ მარტივი პროცედურის გავლაში ანაზღაურებას ითხოვენ. არ ღირს სხვას გადაუხადოთ იმაში, რისი გაკეთებაც თავად შეგიძლიათ.

ტოეფელის საიტზე ანგარიშის გახსნა არის უფასო. თანხის გადახდა ხდება მხოლოდ გამოცდაზე რეგისტრაციისათვის. დღეისათვის ოფიციალური გადასახადი არის 160$. თუმცა დროთა განმავლობაში შეიძლება ადმინისტრაციამ ფასი შეცვალოს. ამიტომ რეგისტრაციამდე საიტზე კიდევ ერთხელ გადაამოწმეთ ხოლმე.

რა ნაბიჯები უნდა გაიაროთ საგამოცდო რეგისტრაციამდე?

 პირველ რიგში, შედით ტოეფელის ოფიციალურ საიტზე. ზედა მარჯვენა კუთხეში დააჭერთ My Toefl iBT account.

შედეგად გამოჩნდება შემდეგი ფორმა:

 დააჭერთ New User?-ის ქვემოთ Sign Up-ს და დაიწყებთ ეკრანზე გამოსული ფორმის შევსებას. ეს არის მარტივი ანკეტა, სადაც პირადი და საკონტაქტო მონაცემები უნდა შეიყავანოთ. ფორმა უნდა შეავსოთ ლათინური ასოებით, სახელი დაწეროთ ზუსტად ისე, როგორც ოფიციალურ დოკუმენტებშია. მაგალითად, თუ პასპორტში გიწერიათ Giorgi, ანკეტაში არ დაწეროთ George. წინააღმდეგ შემთხვევაში გამოცდის დღეს იდენტიფიკაციის პრობლემა შეიქმნება.

წითლად მონიშნული გრაფები სავალდებულო შესავსებია, თუ მონაცემს არ შეიყვანთ, შემდეგ გვერდზე არ გადავა და საბოლოო ჯამში რეგისტრაციას ვერ მოახერხებთ.

გრაფაში Country/Location of Residency – მიუთითეთ ფაქტიური საცხოვრებელი ქვეყანა. ეს არ არის ჩაწერის ადგილი, არამედ მისამართი, სადაც რეალურად იმყოფებით და სადაც  შემდეგში მოხდება ქულების გამოგზავნა, ამიტომ შეავსეთ სწორად. First/Given name – სახელი, Last/Family name – გვარი. Address line 1-ში, ბინისა და ქუჩის ნომერი (ჯერ ბინა, შემდეგ ქუჩა). თუ მისამართი მეტისმეტად გრძელია, მეორე და მესამე გრაფებში გააგრძელებთ.  10 Javakhishvili street.

ცალკე გრაფა აქვს ქალაქს, ამიტომ ქუჩასთან ერთად ქალაქის სახელი არ ჩაწეროთ.

სავალდებულო შესავსებში არ არის საფოსტო კოდი, თუმცა სასურველია რომ მიუთითოთ. თუ არ იცით თქვენი ქუჩის კოდი, მოძებნეთ საქართველოს ფოსტის საიტზე.

 დაბადების თარიღი: თვე, რიცხვი, წელი ოთხნიშნა რიცხვით.

ამის შემდეგ აუცილებელია საკონტაქტო ინფორმაციის შევსება. სავალდებულოა ტელეფონის ნომრის ჩაწერა (ტელეფონის ნომერი უნდა შეიცავდეს ქვეყნისა და ქალაქის კოდებს: + 995 (ქალაქის ან მობილური ოპერატორის კოდი) 123456).

იმ შემთხვევაში თუ ელექტრონული ფოსტით გირჩევიათ კონტაქტი, ჩაწერეთ მოქმედი მისამართი და მონიშნეთ E-mail. თუ გსურთ რომ პერიოდულად მიიღოთ ცნობები სიახლეებისა და სპეციალური შემოთავაზებების შესახებ, მონიშნეთ შესაბამისი გრაფა.

იმ შემთხვევაში, თუ გაერთიანებულ სამეფოში ან ავსტრალიაში აპირებთ სწავლას, მუშაობას ან დასახლებას, ანკეტაში უნდა შეიტანოთ საკუთარი საპასპორტო ან ID მონაცემები.

გარდა ამისა, უნდა ამონიშნოთ ქვეყანა, სადაც დაიბადეთ, მშობლიურ ენა, მოქალაქეობა და ქვეყანა, სადაც ცხოვრებას, დასახლებას ან მუშაობას აპირებთ. დანარჩენი გრაფების შევსება არ არის სავალდებულო.

შემდეგ უნდა მონიშმოთ Yes I agree terms and conditions და დააჭიროთ Continues-ს.

ბოლო ეტაპი არის სამომხმარებლო სახელისა და პაროლის შექმნა. სახელი უნდა იყოს 6-16 სიმბოლო, არ არ უნდა შეიცავდეს სპეციალურ სიმბოლოებს (როგორიცაა @$^*&#_-$)

პაროლი უნდა იყოს 8-16 სიმბოლო და შეიცავდეს დიდ და პატარა ლათინურ ასოებსა და რიცხვებს. უსაფრთხოების მიზნით არ შეიძლება სამომხმარებლო სახელის, გვარის ან სახელის გამოყენება პაროლად.

შემდეგ საიდუმლო კითხვის შექმნის დროა. სისტემა თავადვე გთავაზობთ რამდენიმე ვარიანტს, ამოირჩიეთ და შეავსეთ ერთ-ერთი. პაროლის დავიწყების შემთხვევაში ეს დაგეხმარებათ.

შემდეგ დააჭირეთ continue-ს. შედეგად ეკრანზე გამოვა თქვენი სარეგისტრაციო მონაცემები. თუ რამე შეგეშალათ შეგიძლიათ შეასწოროთ, შემდეგ კი დააჭირეთ confirm-ს.

ახლა როდესაც ექაუნთი შექმნილია, შემდეგ ეტაპზე უნდა გადახვიდეთ: დარეგისტრირდეთ ტოეფელის გამოცდისთვის.

სისტემაში შესვლის შემდეგ ეკრანზე გამოდის ასეთი ფორმა:

უნდა დააჭიროთ Test Registration and Orders-ის ქვემოთ Register/Order-ს. გამოჩნდება  შემდეგი ფორმა:

ამოარჩიეთ Teofl Test. შემდეგ I So Sign and Agree.

ქვეყნის არჩევის შემდეგ გამოდის ქალაქები, სადაც ტოეფელის ოფიციალური ცენტრებია. საქართველოს შემთხვევაში ეს არის აღ. საქართველო (თბილისი) და ბათუმი.

ქვემოთ უნდა მონიშნოთ სასურველი თარიღები 60 დღის შუალედით. მაგალითად 22 სექტემბრიდან 24 ნოემბრამდე. უფრო დიდ შუალედს სისტემა უბრალოდ არ გაჩვენებთ.

Search-ზე დაჭერის შემდეგ გამოდის ყველა იმ საგამოცდო ცენტრის ჩამონათვალი, რომელიც თავისუფალია მოცემული პერიოდის განმავლობაში. ორგანიზაციების დასახელება, მისამართი, ხელმისაწვდომი დღები და საათები.

სასურველი დროისა და ადგილის არჩევის შემდეგ გამოდის სრული ინფორმაცია.

შემდეგ უნდა აირჩიოთ როგორ გირჩევიათ ქულების მიღება: მხოლოდ ონლაინ თუ საფოსტო გზავნილის სახითაც.

შემდეგ ეტაპზე შეგიძლიათ მონიშნოთ 4 უნივერსიტეტი, სადაც ETS უფასოდ გაგზავნის ქულებს. იმ შემთხვევაში, თუ არჩევანი გაკეთებული არ გაქვთ, შეგიძლიათ ეს გრაფები ღიად დატოვოთ. თუმცა ტესტის ჩაბარების შემდეგ ქულების გაგზავნა უკვე ფასიანი იქნება – თითოეული მისამართისთვის 17$.

სასურველი უნივერსიტეტის მოძებნა მარტივად შეიძლება: ინდივიდუალური კოდით, სახელით, ან ქვეყნის მიხედვით.

უნივერსიტეტის არჩევის შემდეგ უნდა განსაზღვროთ რომელი დონის/სკოლის სტუდენტობა გსურთ. Undergraduate – ბაკალავრიატი, graduate – მაგისტრატურა, შეიძლება ასევე გამოჩნდეს კონკრეტული სკოლების დასახელებები.

ამის შემდეგ ჩამოშალეთ დეპარტამენტთა ჯგუფების ჩამონათვალი

შემდეგ – კონკრეტული დეპარტამენტები:

ბოლო ეტაპია სტატისტიკური კითხვების შევსება, როგორიც არის რისთვის გსურთ ტოეფელის ჩაბარება და ა.შ. თუმცა ეს არ არის სავალდებულო, სურვილის შემთხვევაში შეგიძლიათ გამოტოვით.

შემდეგ დათანხმება სარგებლობის პირობებზე:

Value Pack – ფასიანი მომსახურებებია, რომელიც ნებაყოფილობითია. თუ ზედმეტი $-ების დახარჯვა არ გსურთ, No, thanks მონიშნეთ და გააგრძელეთ.

ბოლო ეტაპი არის საგამოცდო თანხის გადახდა ელექტრონული სახით ან ვაუჩერით. ელექტრონული გადახდისათვის აუცილებელია საკრედიტო ბარათი ანგარიშზე სათანადო თანხით. დღეისათვის ეს არის 160$. მონიშნეთ Electronic Payment და გააგრძელეთ ფორმის შევსება.

მონიშნეთ ვიზა და გადადით შემდეგ ეტაპზე.

 შეიყვანეთ მისი მონაცემები: ბარათის ტიპი, ნომერი, მოქმედების ვადა Card Verification Code, რომელსაც მის უკანა მხარეს იპოვით. Billing Information-ში მონიშნეთ Use Ship to name too Bill to name და Use ship to Address to Bill to address და ავტომატურად ჩასვამს პირად მონაცემებსა და მისამართს. შემდეგ დაამთავრეთ რეგისტრაცია.

ბოლო ეტაპზე შეამოწმეთ ელექტრონული ფოსტა. აქ უნდა იყოს confirmation email, სადაც დაწვრილებით ეწერება გამოცდის დრო, ადგილი, წარსადგენი დოკუმენტები.

ამით Toefl iBT-ის გამოცდისათვის რეგისტრაცია დასრულებულია. ისღა დაგრჩენიათ მოემზადოთ და დანიშნულ დროს საგამოცდო ცენტრში მიხვიდეთ.

წარმატებას გისურვებთ! 🙂