ბაგინეთი – 2014


ბაგინეთი ის ადგილია, სადაც მომაბეზრებელი ქალაქისგან ცოტა ხნით დასვენება შეიძლება. ბაგინეთიდან მცხეთა-ჯვარისკენ დიდებული ხედი იშლება. ჩამოედინება მდინარე მტკვარი, ჩანს წითელსახურავიანი სახლები. შემოდგომის ფერებს ბუნებრივად ეხამება ქალაქის ხედი.

მცხეთა. ხედი ბაგინეთიდან

მცხეთა. ხედი ბაგინეთიდან

აქ არ არის ხმაურიანი ქუჩები, არც  მანქანები და არც  ინტერნეტი ( 🙂 ). ინტერნეტი საიდან იქნება, ბაგინეთის მთელი არსებობის მანძილზე ასეთ რამეს ოცნებაშიც კი ვერ წარმოიდგენდნენ მისი მკვიდრები. ლეონტი მროველი ირწმუნებოდა, რომ ბაგინეთის დასახლებას ქართველთა მამამთავარმა ქართლოსმა ჩაუყარა საფუძველი. ეს იყო ანტიკური ხანის დიდი, აყვავებული ქალაქი, მნიშვნელოვანი სავაჭრო-პოლიტიკური ცენტრი, რომლის გამაგრებული კედლები რამდენიმე კილომეტრს მოიცავდა. მას ჰქონდა გამართული ინფრასტრუქტურა, ფუნქციონირებდა რელიგიური დაწესებულებებიც. დაწვრილებითი ინფორმაცია ამ კულტურული ძეგლის შესახებ ძეგლები.გე-ს ვებსაიტზეა გამოქვეყნებული.  იგი მდებარეობს თბილისი-მცხეთის გზაზე, პირდაპირ გადაჰყურებს სვეტიცხოველს. ზედ გზისპირზე “ბაგინეთის” ნიშნულია, ბილიკს მიჰყავხარ კიბეებამდე, კიბე კი ანტიკური ხანის ციხე-ქალაქში მიგიძღვება. შესასვლელში შემორჩენილია დიდგვაროვანი ქალის აკლდამა, ცოტა ზემოთ – რამდენიმე სხვადასხვა დანიშნულების შენობა.

Continue reading

“მეზობლები არ შეაწუხოთ” ანუ რატომ არ უნდა გაჩერდეთ სასტუმრო “ფიჭვნარში”, ქობულეთი


“დაბოღმილი” პოსტი, რომელიც აუცილებლად უნდა წაიკითხოთ.

თითქმის ერთი კვირა ქობულეთში გავატარე – სასტუმრო “ფიჭვნარი”, აღმაშენებლის 626. ეს ის ადგილია, სადაც არ უნდა წავიდეს ადამიანი, ვისთვისაც სერვისები მნიშვნელოვანია. სასტუმროს უპირატესობა მხოლოდ ზღვასთან სიახლოვე და ფასია, სხვა დანარჩენი კრიტიკას ვერ უძლებს.

1. საოცრად უყურადღებო პერსონალი. ყველა ჩვენს თხოვნას აბსოლუტური გულგრილობით ხვდებოდნენ. რატომღაც დარწმუნებული იყვნენ რომ სასტუმროში ყველაფერი რიგზე იყო. საუზმეზე დაგვიანებულებს მისალმების მაგივრად შეცხადებით გვეგებებოდნენ: “უი, თქვენ ახლა მოხვედით?!”  და თუ არ ეტყოდი აზრადაც არ მოსდიოდათ საკვების შეთავაზება/მოტანა. ღამე ციოდა, თბილი საბნები ვთხოვეთ და უხეშად მოგვიშორეს (“მთელი დღე დავრბივართ და ვერ მოგიტანთ”). ვინც მეტი დაჟინება გამოიჩინა, საკმაოდ თხელი და სუნიანი დასაფარებელი მისცეს (მაინც სციოდათ). სასტუმროს პატრონმა უტაქტო და შეურაცხმყოფელი შენიშვნა მისცა ჩვენს უცხოელ სტუმარს წონასა და ფორმაზე. რა თქმა უნდა, ეს უკანასკნელი ძალიან ნაწყენი დარჩა.  Continue reading

როგორ გავფრინდეთ ევროპაში იაფად


ყველაფერი ოცნებიდან იწყება. ჯერ აზრი იბადება, მერე – მიზანი, შემდეგ ნელა-ნელა მოქმედების გეგმა მუშავდება და ერთ მშვენიერ დღეს აღმოაჩენ რომ ოცნება რეალობად იქცა. ყველაზე წარმოუდგენელი ფანტაზიაც კი შეიძლება ახდეს. არ გჯერათ? მფრინავი ხალიჩა გაიხსენეთ, ალადინს რომ დააქროლებდა და პარალელი გაავლეთ თანამედროვე საფრენ აპარატებთან. შერეკილები, ანუ ადამიანები, რომლებიც “რეალობას” არაფრად აგდებენ და საკუთარი ოცნების ასახდენად მუშაობენ, ცვლიან მსოფლიოს.

ძმებმა რაიტებმა 1903 წელს თავიანთი პირველი 12-წამიანი ფრენით მთელი მსოფლიო გამოიწვიეს. თავიდან არავის სჯეროდა. “ადამიანს შეუძლია ხმელეთზე სიარული, ცურვაც, მაგრამ ფრენა? არა, ეს მეტისმეტია”, – ფიქრობდნენ ისინი. რაიტებს უამრავი ცნობისმოყვარის თვალწინ საკუთარი მიღწევის დემონსტრაცია სჭირდებოდათ, ისინი უფროდაუფრო ხანგრძლივი ფრენებით და გაუმჯობესებული თვითმფრინავის მოდელებით აოცებდნენ ცივილიზებულ საზოგადოებას.

ძმები რაიტების თვითმფრინავის მოდელი ჩიკაგოში

ძმები რაიტების თვითმფრინავის მოდელი ჩიკაგოში

2011 წელს ჩიკაგოს მეცნიერებისა და ინდუსტრიის მუზეუმში მათი პირველი საფრენი აპარატის მოდელი ვნახე, რომელმაც ვნებათაღელვის თეორიები, ვერტიკალური და ბრუნვადი სიყვარულები ხელშესახები გახადა. ადამიანი შეეჯიბრა ჩიტებს, დაიწყო ჰაერის დაპყრობა, დროისა და სივრცის გადალახვა. უცხო ქვეყნების მონახულება უფრო ხელმისაწვდომი გახდა და ნებისმიერ პიროვნებას მიეცა საშუალება თავი ისე ეგრძნო, როგორც მარკო პოლოს ახალი მიწების მონახულებისას. იმ განსხვავებით, რომ საჰაერო გზის “აღმოჩენამ” წარმოუდგენლად შეამოკლა დრო თუნდაც ყველაზე შორეული დანიშნულების ადგილამდე მისასვლელად. XVIII საუკუნის დასაწყისში სულხან საბა ორბელიანს რამდენიმე თვე, უამრავი რესურსი, კლიმატური და რელიეფური სიძნელეების გადალახვა დასჭირდა ევროპამდე ჩასაღწევად, თანამედროვე თვითმფრინავები კი იგივე მანძილს სულ რამდენიმე საათში ფარავენ.

ფრენების მიმართულება ქუთაისის ეროპორტიდან

ფრენების მიმართულება ქუთაისის აეროპორტიდან

ასე რომ, თუ ევროპაში მოგზაურობაზე ოცნებობ, ამის გაკეთება ძალიან ადვილია: ქუთაისის საერთაშორისო აეროპორტიდან იაფი რეისები რამდენიმე ქვეყნის მიმართულებით სრულდება. მათგან ზოგიერთში შესასვლელად ვიზა არ არის საჭირო (უკრაინასა და ბელორუსიაში). მგზავრებმა ასევე შეიძლება ისარგებლონ გამარტივებული სავიზო რეჟიმით, რაც ნიშნავს რომ მათ შეუძლიათ 3-დან 90 დღემდე ერთჯერადი ვიზების მიღება აეროპორტში, სასაზღვრო სამსახურში. ასეთი ქვეყნების სია, ასევე სავიზო დოკუმენტების ჩამონათვალი გამოქვეყნებულია საქართველოს საგარეო საქმეთა სამინისტროს საიტზე.  Continue reading

კომბლე, ჩურჩხელები, აიპადი და ბევრი სიამოვნება კახეთში


kaxetis mama

“კახეთის მამა”

თუ რამე ან ვინმე შეიძლება მოვიაზროთ კახეთის სიმბოლოდ, ეს მამაკაცი საუკეთესო კანდიდატია. 🙂 როგორც კი დავინახე, მაშინვე ვიფიქრე, ხომ არ სჯობია ქართლის დედის ანალოგიურად სადმე, გამოსაჩენ ადგილას (თუნდაც კავკასიონზე) “კახეთის მამის” სიმბოლური ძეგლი დაიდგას მეთქი. სტუმარი რომ დაინახავს ქანდაკებას ცალ ხელში ჩურჩხელით და მეორეში აიპადით, მაშინვე მიხვდება, რომ უნიკალური ტრადიციების მქონე რეგიონში მოხვდა, რომელიც არც განვითარებაზე და თანამედროვე ტექნოლოგიებზე ამბობს უარს.  სწორედ ეს არის კახეთის განვითარების პროექტის მთავარი მიზანი, რომლის შესახებ ვწერდი პოსტში “სოფლის მაშენებლები”.

თუ გიყვართ ისტორია, მოგზაურობა, ლიტერატურა, ან უბრალოდ გინდათ თბილისიდან ერთი დღით გასვლა – კახეთი გელით! სულით, გულით, გაშლილი ხელებით, თავისი ძეგლებით, ულამაზესი ბუნებით – ეს ის ადგილია, შეგიძლიათ სრულფასოვნად დაისვენოთ და უზომოდ ისიამოვნოთ!

 რა დაგხვდებათ კახეთში?

პირველ რიგში, კარგი გზები. ისე ჩაღიღინდებით დანიშნულების ადგილამდე, რომ ვერც კი გაიგებთ! სადღაა ორმოები, გუბეები და ქვები! მგზავრობა უფრო იოლი და ხანმოკლეა, საათნახევარიც არ არის საჭირო თელავამდე მისაღწევად!

თელავში, ისევე როგორც სხვა ადგილებში, მიმდინარეობს მუშაობა იმისათვის, რომ აქ მოგზაურმა თავი კარგად იგრძნოს. მსოფლიო ბანკის მიერ დაფინანსებული რეაბლიტაციის პროექტის ფარგლებში უკვე აღდგენილია მთელი რიგი შენობები, ნაწილიც მალე დამთავრდება. და მაინც, საკმაოდ ბევრი ობიექტია, რომლის  განსხვავება 2 წლის წინანდელსა და ახლანდელ მდგომარეობას შორის თვალშისაცემია. Continue reading

სოფლის მაშენებლები


ერთი ძაღლი და ერთი მამალი დაძმობილდნენ: სოფელი ავაშენოთო!
ძაღლმა უთხრა: როგორ ავაშენოთო?
მამალმა უთხრა: შენ იყეფე, მე ვიყივლებ და აშენდებაო. დაიწყეს სოფლის შენება.

ბევრი იყივლეს, იყეფეს, ცოტა ხერხი და ცულიც მიაშველეს, მაგრამ რად გინდა! ხერხი ჟანგიანი იყო, აშენებული სახლი ფერდმოქცეული გამოვიდა, სულ არ უხდებოდა ტყეს. სახურავიდანაც წყალი ჩამოდიოდა, გვერდებიდან ქარი უბერავდა. დაღონდნენ ძაღლი და მამალი, აქ ვინ უნდა იცხოვროსო?!
სად იყო და სად არა, მოცუნცულდა მელია.
– რა გაგჭირვებიათო?
– სოფელს ვაშენებთო, – უპასუხა მამალმა, – მაგრამ აქ ყოფნა გაგვიჭირდება ისეთი სახლები გამოვიდა, მასალაც აღარ გვაქვს რომ შევაკეთოთო.
– ამის წამალი მე ვიციო, ანუგეშა მელამ, – მასალასაც მოგცემთ, ცულსაც ცუნცულას, ხელეჩოს და წალდუნასაც, ოღონდ სხვა ცხოველებსაც ვკითხოთ როგორი სახლები უნდათ, ექსპერტი ციყვებიც ჩავრთოთ მშენებლობის პროცესშიო. მთელ ტყეში დარბიან და იციან სად როგორ ხე დგას, რისი აშენება და შეკეთება სჯობიაო.
ძაღლი და მამალი დათანხმდნენ. ყეფას და ყივილს მოუკლეს, მუშაობას მოუმატეს. ძველი სახლების ფასადები შეცვალეს, ზოგს სახურავი გადახურეს, ზოგს ჭიშკარი ჩამოკიდეს, კედლები ამოუყვანეს, კომუნიკაციები გამართეს. ცოტა ხანში ტყის სოფელი გალამაზდა, მოიმატა სტუმრიანობამ და მხიარულებამ. ბუებმა ახალი ფუღუროთა კომპლექსი გახსნეს ჩამოსული ჩიტების მოსასვენებლად, მაჩვებმა ხილისა და კენკრის ბიზნესი გააფართოვეს……
—————————-
არაიგავურად რომ მოგახსენოთ, ეს ყველაფერი ეხება კახეთის რეგიონული განვითარების პროექტს, რომელიც მსოფლიო ბანკის დაფინანსებით უკვე მეორე წელია მიმდინარეობს. რეაბილიტაციის პროცესში ჩართულია მთავრობა და ადგილობრივი ჯგუფები (მოსახლეობა, ექსპერტები, არასამთავრობო თუ კერძო ორგანიზაციები, თემები და ა.შ.). პროექტი მიზნად ისახავს კახეთის ტურისტული პოტენციალის, ასევე ინფრასტრუქტურლ და ეკონომიკურ განვითარებას. ხდება გზების, ტურისტული დანიშნულების ადგილების რესტავრაცია/რეკოსნტრუქცია.

რატომ კახეთიო? იკითხავს დაინტერესებული მკითხველი.
– იმიტომ, რომ კახეთის, როგორც ტურისტული დანიშნულების ადგილის პოპულარობა იზრდება. ბოლო წლების განმავლობაში იზრდება აქ ჩამოსული ტურისტების რაოდენობა, ადგილს იმკვიდრებს მსოფლიო რეიტინგების ათეულებში. აი მაგალითად, ერთ-ერთი პოპულარული სამოგზაურო საიტზე – http://www.lonelyplanet.com/ გამოქვეყნებულია კახეთის შესახებ 95 სტატია,  რომლებიც შეიცავს ინფორმაციას ძეგლების, ჰოსტელების, მუზეუმების შესახებ.
კახეთი სულ უფრო ხშირად ჩნდება უცხოურ რეიტინგებში, ბლოგებში, ტურისტულ მიმოხილვებში, მათ შორის ისეთ ავტორიტეტულ წყაროებში, როგორიც არის CNN.  ტურისტების ინტერესის ზრდის პარალელურად, ბუნებრივია, რომ აუცილებელია ძეგლებთან მისასვლელი გზების, მონუმენტების, სასტუმროების, საინფორმაციო სერვისების დანერგვა/გაუმჯობესება.

– კიდევ იმიტომ, რომ კახეთს გააჩნია ხელსაყრელი გეოგრაფიული მდებარეობა და რესურსები, გახდეს პოპულარული ტურისტული ადგილი. თბილისთან ახლოს ყოფნა, ბუნება, უამრავი ისტორიული ძეგლი, ასევე “ღვინის სამშობლოდ” ყოფნა ის ღირსებებია”, რაც ვიზიტორებისთვის მიმზიდველად წარმოაჩენს. რომანტიკა, თავგადასავალი, ერთგვარი ეგზოტიკა უდავოდ კახეთის ღირსებებია. რაც აკლია, ეს არის გარკვეული სახის კომფორტი.

– ეკონომიკური და სოციალური ფონი, რომელსაც (პირდაპირი ან ირიბი გზით) გაუმჯობესება სჭირდება.
ამიტომ, მსოფლიო ბანკის დაფინანსებით განხორციელებულ კახეთის განვითარების პროექტში რამდენიმე პრიორიტეტული მიმართულება გამოიყო.
ამ საკითხებზე გვესაუბრნენ მსოფლიო ბანკის წარმომადგენლები ბლოგერებს 26 სექტემბრის შეხვედრაზე. გვითხრეს, რომ კახეთის რეაბილიტაციისას კახეთის რეაბილიტაციისას ცდილობდნენ ადგილობრივი იერსახის შენარჩუნებას. ძეგლებზე, შენობებზე, რაც შესაძლებელი იყო აღდგა, რაც არა – იმგვარად გა(და)კეთდა, რომ  შეენარჩუნებინა ძველებური იერი. ეს არის ის, რასაც უცხოელები აფასებენ და რის გამოც შეიძლება გამოიაროს ათასობით კილომეტრი დაინტერესებულმა ტურისტმა. ამგვარად შეიძლება ერთდროულად კულტურული მემკვიდრეობის შენარჩუნება და ადგილობრივი ეკონომიკის განვითარების ხელშეწყობა. 
კახეთის რეგიონული განვითარების პროექტის ვირტუალური ტური ძალიან შთამბეჭდავი აღმოჩნდა. განსხვავება ყოფილ და ახლანდელ მდგომარეობას შორის საკმაოდ მნიშვნელოვანი იყო. ჩაქცეული, დანგრევის პირას მყოფი შენობების მაგივრად ახლა ძველისა და ახლის სასიამოვნო სინთეზი დგას. დიზაინი მაქსიმალურად მიახლოებულია ორიგინალს/ადგილობრივ კულტურას. თელავის მაგალითზე, ფოტოებიდან და ქალაქის იერსახიდან ქრება უსახური, ცივი შენობები, ჩამონგრეული სახლები, კედლებჩამოშლილი საცხოვრებლები, მათ ადგილს იკავებს ლამაზი, დახვეწილი შენობები.

შენობები თელავში რესტავრაციამდე და მის შემდეგ

შენობები თელავში რესტავრაციამდე და მის შემდეგ

შეხვედრაზე ასევე გვითხრეს, რომ ტურიზმი – ეს არ არის ერთდღიანი გასეირნება ქალაქგარეთ. ეს არის უფრო ხანგრძლივი პროცესი, როდესაც ადამიანი/ჯგუფი სულ მცირე ერთ ღამეს რჩება დანიშნულების ადგილზე. ამისათვის კი აუცილებელია კარგი სერვისი, სასტუმროები, ჰოსტელები, სადაც სხვადასხვა ფინანსური შესაძლებლობის მქონე ტურისტებს ღამის გათევა შეეძლებათ. ალავერდი, დართლო, სიღნაღი, ყვარლის ტბა, შუამთა, წინანდალი, დავით გარეჯა – არასრული ჩამონათვალია იმ ობიექტების, რომლებიც მსოფლიო ბანკის დაფინანსებით და ხელშეწყობით გაკეთდა. რა თქმა უნდა, ადგილობრივი მთავრობისა და ხალხის ჩართულობით.
ამას ემატება გაუმჯობესებული გზები, და შესაძლებლობა ადგილობრივებისათვის – დაიწყონ საკუთარი ბიზნესი. მსოფლიო ბანკი სესხს გამოუყოფს მათ, ვინც მოინდომებს ჰოსტელების/სასტუმროების მოწყობას, ხელნაკეთი ნივთების დამზადებას და პოპულარიზაციას… ვებსაიტის საშუალებით mdf-kakheti.biz, – საქართველოს მუნიციპალური განვითარების ფონდი, მსოფლიო ბანკის თანადაფინანსებით გამოუყოფს ინვესტიციებს კერძო მეწარმეებს ტურიზმსა და აგრობიზნესში იდეების განსახორციელებლად. მსურველს შეუძლია საიტზე შეავსოს მარტივი სააპლიკაციო ფორმა, შემდეგ კი დაელოდოს გამოხმაურებას.

ასევე გვითხრეს, რომ იაპონიის მთავრობას გამოყოფილი აქვს $2,5 მილიონი ადგილობრივი ქალებისათვის, ვისაც სურს მცირე ბიზნესის წამოწყება.
დამეთანხმებით, საკმაოდ დიდი შესაძლებლობებია.
და ამ ყველაფერს თუ დავუმატებთ თითოეულ აღდგენილ ძეგლთან მოწყობილ კაფეს, საინფორმაციო ცენტრს და უკაბელო ინტერნეტს (სამომავლოდ), ალბათ ახლადჩამოსულ ტურისტებს საწუწუნო მიზეზები აღარ ექნებათ 🙂
კიდევ რა გაკეთდა?

– კახეთის ტურისტული გვერდი, სადაც სამ ენაზე (ქართულად, რუსულად და ინგლისურად) ამომწურავი ინფორმაციაა განთავსებული ძეგლების, მუზეუმების, ღვინის ტურიზმის და ნებისმიერი იმ საკითხის შესახებ, რაც შეიძლება სტუმარს აინტერესებდეს. ადრე ინტერნეტში მიხდებოდა ძებნა საექსკურსიო/საფეხსკურსიო ადგილების. ახლა კი ვიცი სად შეიძლება ვნახო მარშრუტები, მომსახურების ობიექტები, სიახლეები…

– ასევე შეიქმნა სლოგანი, რომელიც მეტად დამაინტრიგებლად ჟღერს – აღმოაჩინე შენი კახეთი

ფეისბუქის გვერდი, სადაც პერიოდულად იდება ინფორმაცია კახეთში მიმდინარე ღონისძიებებისა და სიახლეების შესახებ. დალაიქების შემთქვებაში თვალს მიადევნებთ რა ხდება კახეთში, რა ღონისძიებები/ფესტივალები მიმდინარეობს.
kakheti brand– შეიქმნა კახეთის, როგორც ტურისტული ბრენდის, ლოგო, რომელიც ტურიზმის სამ ძირითად მიმართულებას ასახავს: კულტურული ტურიზმი, სათავგადასავალო ტურიზმი და ღვინის ტურიზმი. ეკლესია განასახიერებს მონუმენტებს, ისტორიულ-არქიტექტურულ ძეგლებს; მთები – ადგილებს სადაც დაუვიწყარი შთაბეჭდილებების მიღება შეიძლება; ქვევრს კი ალბათ განმარტება არ სჭირდება. ვის არ მოხიბლავს რთველი, მარნები, ადგილობრივი მუზეუმები.

ლოგოს პოპულარიზაცია უკვე მიმდინარეობს, მალე კიდევ უფრო ინტენსიურად გამოჩნდება სხვადასხვა ადგილებში,მათ შორის ინტერნეტშიც.

რა იგეგმება უახლოეს მომავალში?
– კახეთის მობილური აპლიკაციის გამოშვება, რომელიც ვიზიტორს გაუადვილებს მოძრაობას, მარშრუტების დაგეგმვას, ასევე საკუთარი თავგადასავლის გაზიარებას სხვებისათვის
– სპეციალური მარშრუტების შემუშავება სკოლის მოსწავლეებისათვის, სუვენირების დამზადება, რომლებიც უფასოდ დაურიგდებათ – ხომ უნდა იამაყონ საკუთარი სამშობლოთი!
19-20 ოქტომბერს მსოფლიო ბანკის მიერ ორგანიზებული საინფორმაციო ტურის ფარგლებში რამდენიმე ბლოგერი თელავსა და ყვარელს უნდა ვესტუმროთ. დაგეგმილია ადგილობრივი ფესტივალები (ღვინის, კერამიკის, დოკუმენტური ფილმების, ხელნაკეთი ნაწარმის და ა.შ.), ასევე დავათვალიერებთ იმ ადგილებს, რომელთა რეაბილიტაცია/რესტავრაცია მოხდა ბოლო 2 წლის განმავლობაში.  ვნახავთ, რამდენად ლამაზი “სოფელი” ააშენეს. შთაბეჭდილებებსაც გაგიზიარებთ. მანამდე კი ისიამოვნეთ ვირტუალური ტურით კახეთში:

ღრუბლებს ზემოთ


ფრენას ორი მხარე აქვს: კარგი და ცუდი.

კარგი ის არის, რომ ღრუბლებზე მაღლა ადიხარ. სამყარო ნელა-ნელა პატარავდება და გუგლის რუკების სახეს იღებს. ზემოდან გადაჰყურებ მთებს, ტყეებს, მდინარეებს, ერთი ციდა სახლებს და იწყებ ფიქრს იმის შესახებ რას შეიძლება გრძნობდეს ღრუბლებზე ჩამომჯდარი პეპელა. ამ სიმაღლეზე ფრინველებიც იშვიათად აღწევენ. სიმშვიდეს მხოლოდ თვითმფრინავის ძრავების ხმაური არღვევს. დროდადრო სტუიარდესები მოდიან და სტანდარტულ მენიუს გთავაზობენ. ახლომახლო ძაღლის ჭაჭანება არ არის… მიფრინავ და ნიშნისმოგებით ფიქრობ ალადინზე, რომელიც თავისი ჯადოსნური ხალიჩით მხოლოდ სასახლის სახურავის სიმაღლეზე დაფრინავდა. სასახლე კი ჩვენებურ თექვსმეტსართულიანზე მაღალი ნამდვილად არ იყო!

ფრენაში ცუდი ის არის რომ სადღაც ღრუბლებს ზემოთ ხარ გამოკიდებული. მიფრინავ, მიფირნავ. კლავიატურის კაკუნს მიჩვეული თითები თავისთავად დახტიან და შეჩვეულ ადგილებს ეძებენ… მაგრამ სანუგეშო პერსპექტივა არ ჩანს. რაც დრო გადის, უფროდაუფრო მეტად ნერვიული ხდება კიდურების მოძრაობები და ვაი იმას, ვინც პირველი მოგხვდება ხელში! 😀 ფრენის საათები ხშირად მოსაწყენია, განსაკუთრებით მაშინ, თუ თვითმფრინავს დროის მოსაკლავი საშუალებები არ გააჩნია. არც ფილმი, არც მუსიკები.. მხოლოდ მგზავრები და ღრუბლები…

ასეთი ხედი იშლება ღრუბელებს ზემოდან

ასე ავფრინდი თბილისიდან გუშინ და კიევის გავლით სიმფეროპოლის აეროპორტში დავეშვი. გზა მოსაწყენი იყო. ღრუბლები, ღრუბლები, ბევრი ხალხი თვითმფრინავში, საზიზღარი საკვები და გაუთავებელი კითხვა: როდის ჩავალ?… ქინდლმა მიშველა, მოწყენილობის საათებში დავამთავრე ერთი წიგნი. მერე გამახსენდა, რომ დიდი ხანია ბლოგზე არაფერი დამიწერია და პოსტის მონახაზის გაკეთება დავიწყე… ამასობაში მოგვაკითხა მანქანამ და სევასტოპოლში წაგვიყავნა.

სიმფეროპოლიდან სევასტოპოლამდე დაახლოებით ერთსაათიანი გზაა. შეიძლება მეტი, ან ნაკლები იყოს. დაღლილებმა დროის შეგრძნება დავკარგეთ და შვებით ამოვისუნთქეთ, სასტუმროს რომ მივაღწიეთ.

რამდენიმე დღის განმავლობაში აქ პოლიტიკური იდეოლოგიებსა და კამპანიების წარმოების შესახებ ჩაგვიტარებენ ვორქშოფს საერთაშორისო ტრენერები.

პირველი დღე: არცთუ ისე საინტერესო. სესიები არც ისე ინტერაქტიულია. ტრენერები მონოლოგს ამჯობინებენ, მხოლოდ პრეზენტაციის ბოლოს გადადიან კითხვა-პასუხზე. იმის გათვალისწინებით, რომ გრძელი გზა გვაქვს გამოვლილი, თან ნაცნობი მასალაა, ლამისაა სესიებზე დაგვეძინოს.

დღის პირველი ნახევარი პოლიტიკურ იდეოლოგიებს დაეთმო. ლიბერალიზმი, კონსერვატიზმი, სოციალ-დემოკრატია ის თემებია, რომლებიც ათასგვარ ტრენინგებზე, ლექციებზე, უნივერსიტეტში, სახლში, ბაღში, გივიას დუქანში, დებატებზე და ა.შ. მილიონჯერ განხილული და მოსმენილი მაქვს. ასე რომ  კიდევ ერთელ გამეორება ცდონის დედა კი არა ღვთისგან მოვლენილი სასჯელია 🙂 ამ დროს პოსტის დასაწერად ვიყენებ და შემდეგი სესიისთვის ვემზადები.

მეორე ნაწილი სტრატეგიის დაგეგმვას ეხება. რა ფაქტორები უნდა იყოს გათვალისწინებული, როგორ ააგო სტრატეგია და რა არის საჭირო პოლიტიკური კამპანიის წარმატებისთვის – ყველაფერ ამას დღეს, ხვალ და შემდეგ დღეებშიც კიდევ უფრო დაწვრილებით განვიხილავთ.

დადებითი: ჩვენს რეალობაში დროული და საჭირო ინფორმაციას ვიღებთ

უარყოფითი: ჯერჯერობით რასაც ვუყურებ, ზოგად და ზედაპირულ ცოდნას გადმოგვცემენ.

თემას შემდეგ პოსტში კიდევ უფრო განვავრცობ. მანამდე შეგიძლიათ გამიზიაროთ თქვენი შეხედულებები, თუ რამდენად საჭიროა მსგავსი ტიპის ტრენიგები ქართველი ახალგაზრდებისათვის და ისურვებდით თუ არა თავადაც მის გავლას.

ბრილიანტები ამერიკის მუზეუმში


ვაშინგტონის მუზეუმები ერთი დიდი თემაა. გამოფენილია უამრავი საინტერესო ექსპონატი. ბევრი მათგანი არც ისეთი ძველია, როგორსაც საქართველოში შეხვდებით, მაგრამ უვლიან და უფრთხილდებიან. ბევრი მუზეუმის სტუმრობა უფასოა. სამუშაო და უქმე დღეების განმავლობაში ნებისმიერ ადამიანს შეუძლია შევიდეს და დაათვალიეროს. ეს უზარმაზარი მუზეუმებია, სადაც მთელი დღის განმავლობაში შეიძლება ბოდიალი. მრავალსართულიან შენობებში გამოფენები, კაფეები, სუვენირების მაღაზია და ა.შ. მოკლედ, მთელი სამყაროა. დროთა განმავლობაში დავდებ პოსტებს ამ მუზეუმებისა და მათი ექსპონატების შესახებ, ახლა მინდა ერთ-ერთი საინტერესო გამოფენის შესახებ დავწერო. Museum of natural Hიstory ვაშინგტონის ცენტრშია და საკმაოდ ბევრი მნახველებითაც გამოირჩევა. მრავალფეროვანი გამოფენები დიდსა და პატარას ერთნაირად იზიდავენ.

ერთი სართულის დიდი ნაწილი ძვირფასი ქვების გამოფენას უკავია. მათ შორის საპატიო ადგილი უჭირავს ბრილიანტებს. ამ პატარა ვიდეოზე რამდენიმე ექსპონატია აღბეჭდილი: ნაპოლეონის საჩუქარი მეუღლისადმი, გვირგვინი და საყურეები, ყელსაბამები, სამაჯურები – იმედია თქვენს მოწონებას დაიმსახურებს. უკანასკნელი ყელსაბამს მსოფლიოში ერთ-ერთი ცნობილი, 46-კარატიანი ბრილიანტი ამშვენებს. როგორია?

ჩიკაგო. მეცნიერებისა და ინდუსტრიის მუზეუმი


ამას სიტყვებიით ვერ გადმოსცემ. უნდა ნახო. თუ საგულდაგულოდ დათვალიერება გინდა, სულ მცირე 2 დღე მაინც უნდა დაუთმო. ექსპოზიციები, რომლებიც ერთი ციცქნა გეჩვენება, სინამდვილეში ბევრისმომცველია და საკმაო დროს მოითხოვს. ჩიკაგოს მეცნიერებისა და ინდუსტრიის მუზეუმი მკვდარი გამოფენა კი არა, ცოცხალი სამყაროა. აქ ყველაფერი მოძრაობს, გეთამაშება. თუ გინდა, რომ გაერთო და შთაბეჭდილებებით დატვირთული წამოხვიდე, არც ხალხმრავლობას უნდა შეუშინდე და არც დაღლილობას 🙂 წკაპ

ჩიკაგო


ჩიკაგოში სად ნახავთ განგსტერებს და თავზეხელაღებულ ახალგაზრდებს? ციხეში, ფოტოებზე და ზოგიერთ გარეუბანში.
ქალაქის ცენტრში ნამდვილი ქაჯეთის ციხეა აღმართული. მისი კედლები ცას სწვდებიან და საშიშ დამნაშავეებს იფარავენ. როგორც გვითხრეს, შესვლისა და გასვლის ერთადერთი გზა ვერტმფრენია. ქუჩიდან ციხის ქონგურებს შორის წერტილივით ჩანან მცველები, რომლებიც წინ და უკან დადიან. წკაპ

ამიშების დასახლება – ისტორიული “ნაკრძალი” ამერიკაში



ეს სურათები  შუა საუკუნეების ცხოვრების ამსახველი ფილმის კადრები არაა. ეს თანამედროვე ამერიკაა, თავისი უცნაური მრავალფეროვნებით. ნიუ იორკის ცათამბჯენებსა და ტექნიკის უკანასკნელ მიღწევებზე შეყვარებული ადამიანისათვის კიდევ უფრო გასაკვირია, როგორ შეიძლება XXI საუკუნის მიერ შემოთავაზებულ კომფორტზე უარის თქმა და თითქმის პირველქმნილი უბრალოებით ცხოვრება. წკაპ