ნუ იპარავთ პოსტებს!!!


4 წელზე მეტია ათასობით ადამიანი უფასოდ სარგებლობს იმ რესურსით, რომელსაც საკუთარი დროისა და ენერგიის ფასად ვქმნი და ამ ბლოგზე ვაქვეყნებ. ერთადერთი, რასაც ვითხოვ – საავტორო უფლებების დაცვაა! სანამ რაიმე ინფორმაციას, ან თუნდაც ფრაზის გადატანას გადაწყვეტთ საკუთარ საიტზე, ითხოვეთ ნებართვა!!!! არსებობს კონტაქტის ფორმა, არსებობს კომენტარები, ასევე ელექტრონული ფოსტის მისამართი – gijmaj.press@gmail.com. მომწერეთ! წინააღმდეგ შემთხვევაში იძულებული ვიქნები (1) ინფორმაცია დავხურო და (2) პასუხისგებაში მივცე კანონდამრღვევი! ამით (მატერიალურად) დაზარალდებით თქვენ და ასევე ბევრი მომხმარებელიც, ვისთვისაც სასიცოცხლოდ მნიშვნელოვანია ეს რესურსები!

რომელი გადამზიდით გამოვწეროთ სალაშქრო ზურგჩანთა


გადავწყვიტე რომ ზურგჩანთა ისევ მჭირდებოდა – დიდი, კომფორტული ზურგჩანთა, რომელშიც ჩავალაგებდი ყველა საჭირო ნივთს და ვიმოგზაურებდი. პატარა ყოველდღიური ზურგჩანთა ერთდღიანი გასავლებისთვისაც აღარ მყოფნის - აღარ ეტევა ფოტოაპარატი თავისი ობიექტივით, საწვიმარი, ქინდლი, ნემსი, ძაფი, სანტავიკი, კიდეც ათასი საჭირო წვრილმანი; ზამთარში და მრავალდღიიან გასვლებზე ტანსაცმლისა და საკვების მოთავსებაზე საუბარი უკვე ზედმეტია.

სასურველი ზურგჩანთის შერჩევაზე რთული გადამზიდის პოვნა აღმოჩნდა. კამექსი, რომლის მომსახურებითაც უკვე წლებია ვსარგებლობ, მსგავსი ნივთების წონას მოცულობით ითვლის. საერთო ჯამში დიდი თანხა გამოდის.

სხვა ალტერნატივები:

USSHOP.GE – როგორც რეკომენდაცია გაუწიეს, კვირაში 2 რეისი და კარგი მომსახურება აქვთ. 1 კილოგრამის ფასი $6.5-ია. მაგრამ რომ დავრეკე, მითხრეს რომ ამანათის წონა მოცულობით დაითვლებოდა. 60-ლიტრიანი ზურგჩანთა დაახლოებით 6კგ გამოვიდოდა. იმის გათვალისწინებით რომ მისი რეალური წონა 2კგ-ს არ აღემატება, სხვაობა და ჩამოტანის თანხაც საკმაოდ დიდი გამოდის!

ერთმა მეგობარმა ბარამი მირჩია – საზღვაო ტრანსპორტირება უფრო იაფი ღირსო (1კგ მხოლოდ $2 – იმ ტვირთებისთვის, რომლის მოცულობა 1 კუბურ მეტრზე მცირეა). გამიხარდა – რა კარგია! მხოლოდ $4 ჩემი ოცნების ზურგჩანთისთვის! დავრეკე ბარამის ოფისში და…. ეეეეჰ! მინიმალური გადასახადი $60-ია, სულ მცირე 30 კილოგრამისთვის იანგარიშებაო. საზღვაო გზით ჩამოტანას 45-60 დღე სჭირდება, თანაც განბაჟებისთვის თავად უნდა ჩახვიდეთ ფოთშიო. გული დამწყდა.

ის-ის იყო ხელი ჩავიქნიე, რომ ONEX.GE შემომთავაზეს – გადამზიდი, რომელსაც საყოფაცხოვრებო ტექნიკისა და მსხვრევადი საგნების გარდა ყველაფერი ფიზიკური წონით ჩამოაქვს. 

ფასი – 1 კგ – 8,5 დოლარის ექვივალენტური ლარი ( საჰაერო მომსახურება).

დამრგვალება, მინიმალური 0,1 კგ. ხოლო მას ზევით ყველა ამანათის გადაზიდვის ღირებულება ითვლება მისი ზუსტი წონის მიხედვით. იმ შემთხვევაში, თუ მომხმარებელმა ერთ რეისზე უნდა მიიღოს რამოდენიმე ამანათი და რომელიმე მათგანი იწონის 0,05 კგ ზე ნაკლებს, ასეთი ამანათის წონის დამრგვალება ხდება არა 0,1 არამედ 0,05 კგ-მდე.
ონექსი კარგია ნებისმიერი ნივთისთვის, რომელშიც მოცულობით გაბერილ წონას დაიანგარიშებს სხვა გადამზიდი კომპანია. ადრე რომ მცოდნოდა, აუცილებლად მისი მომსახურებით ვისარგებლებდი ფრისბის გამოწერისას – ჩამოტანისას კამექსმა მოცულობითი წონა მიანგარიშა და 175-გრამიანი ნივთსითვის ნავარაუდებზე 10-ჯერ მეტი გადავიხადე!

როგორ მოვძებნოთ სწრაფად სასურველი ინფორმაცია უნივერსიტეტის ვებგვერდზე


უნივერსიტეტის ვებ-გვერდამდე “მისაღწევად” გრძელი და დამქანცველი ძებნაა: უნდა ნახოთ ათობით კოლეჯი, სპეციალობები, მისაღები საბუთების ნუსხა, გადასახადის თანხა და ა.შ. რაც უფრო სწრაფად მოხდება სასურველი უნივერსიტეტების მოკლე ჩამონათვალის გაკეთება, მით უკეთესი – უფრო ოპერატიულად მოხერხდება იქ საბუთების გაგზავნა.

1. სანამ ძებნას დაიწყებთ – შეიმუშავეთ კონკრეტული კრიტერიუმები: რა არის თქვენთვის მნიშვნელოვანი? გარკვეული მიმართულების შესწავლა? დაფინანსების მიღება? დასაქმების პერსპექტივა? მნიშვნელოვანია, რომ თქვენი მისწრაფებები შეესაბამებოდეს არსებულ რესურსებს (ფინანსურს, აკადემიურს და ა.შ.). მაგალითად, თქვენი საბუთები ტოეფელის 80 ქულით კონკურენტუნარიანი ვერ იქნება უნივერსიტეტში, რომლის მინიმალური მოთხოვნა ტოეფელის 100 ქულაა.

2. გუგლის ზოგადი ძებნის მაგივრად გამოიყენეთ სპეციალური ვებსაიტები, სადაც სასურველი პროგრამების მოძებნა შესაძლებელია სხვადასხვა კრიტერიუმების მიხედვით (გეოგრაფიული მდებარეობა სასურველი ქალაქი სიზუსტით, სასწავლო დისციპლინა, სწავლების დონე და ა.შ.). ასეთებია, მაგალითად http://www.gradschools.com/, http://www.phdportal.eu/ და http://www.bachelorsportal.eu/.  მსგავსი საიტების მოძებნა შესაძლებელია აზიისთვისაც, ასევე კონკრეტული ქვეყნისთვისაც. ეს ძალიან ბევრ დროს და ძალისხმევას დაზოგავს, რადგან ხშირ შემთხვევაში რეგისტრაციის შემდეგ საიტები ჩამონათვლის გაკეთების შესაძლებლობას იძლევიან. ანუ ძალიან მარტივად შეიძლება სასურველი უნივერსიტეტის სიის გაკეთება სისტემიდან გამოსვლის შედეგად. შემდეგ იწყება კონკრეტული მოთხოვნების ძიებისა და ინფორმაციის გაცხრილვის კიდევ ერთი დამქანცველი პროცესი.

3. ვებ-გვერდზე ინფორმაცია გაცხრილეთ თქვენი კრიტერიუმების მიხედვით: უნივერსიტეტებს ხომ ყველა წვრილმანზე აქვთ ინსტრუქციები: იქნება ეს ჩაბარების კრიტერიუმები, ფაკულტეტები, საგნების ჩამონათვალი, კულტურულ-სპორტული ცხოვრება თუ სხვა რამ. ამ რუტინაში რომ არ დაიკარგოთ და დროც დაზოგოთ, მოძებნეთ მხოლოდ აუცილებელი:

3.1 სასურველი სპეციალობა – სექციაში Academics - აქ ნახავთ ინფორმაციას. ყველა დონის, ყველა სპეციალობისა და ყველა კურსის შესახებ. Undergraduate ნიშნავს ბაკალავრიატს, Post/Graduate- ბაკალავრიატისშემდგომ განათლებას. Master – მაგისტრატურას, PhD – დოქტორანტურას. შეიძლება Graduate Education-ში გაერთიანებული იყოს მაგისტრატურისა და დოქტორანტურის სპეციალობები, თუმცა თითოეულთან აუცილებლად იქნება მითითებული რომელი დონის სწავლებაა. შესაძლოა დისციპლინები დალაგებული იყოს სკოლების მიხედვით, მაგალითად ბიზნესის სკოლა, სამართლის სკოლა, მედიცინის სკოლა, ხელოვნების სკოლა და ა.შ. ასეც ადვილად შეიძლება სასურველი სპეციალობის მოძებნა, კურსის სილაბუსის სიზუსტით. გადაათვალიერეთ ყველა პროგრამა  - რამდენად შეესაბამება თქვენს მისწრაფებებს. თუ არ არის ნამდვილად ის, რაც გჭირდებათ – გადადით შემდეგ უნივერსიტეტზე.

3.2 მისაღები კრიტერიუმები: Admissions, რომელიც, თავის მხრივ, შეიძლება დაყოფილი იყოს undergraduate და postgraduate  admission-ად, თითოეულისთვის განსხვავებული მოთხოვნებით. ასევე განსხვავებული მოთხოვნები შეიძლება ჰქონდეს ერთი და იმავე უნივერსიტეტის სხვადასხვა მიმართულების სკოლებს (მაგალითად, ენის მოთხოვნები – ბაკალავრიატისთვის ტოეფელის 60 ქულა, ზოგადი სპეციალობის მაგისტრატურისათვის 80 ქულა, ბიზნესის ან მედიცინის მიმართულებისათვის – 90 და მეტი; ან ითხოვდნენ სპეციალურ ტესტებს, სერთიფიკატებს,  სამუშაო გამოცდილებას და ა.შ.). აკმაყოფილებთ ყველა მოთხოვნას? ძალიან კარგი. წინააღმდეგ შემთხვევაში ან იმუშავეთ მათ გამოსასწორებლად, ან მოძებნეთ ალტერნატიული სასწავლებელი

3.3 სწავლისა და ცხოვრების დანახარჯები – Tuition and Fees - სტუდენტის ერთ-ერთი ყველაზე მტკივნეული თემა. :) კაპიტალისტური სამყაროს სასტიკი კანონების შესაბამისად, სწავლობს ის, ვისაც ფული აქვს, ან მისი შოვნა შეუძლია. ყველა უნივერსიტეტის ვებსაიტზე მოცემულია დაახლოებითი ხარჯები, რაც სტუდენტს სჭირდება 1 აკადემიური წლის განმავლობაში. ეს მოიცავს სწავლის გადასახადს, ასევე საცხოვრებელს, კომუნალურ გადასახადებს, მობილურს, კვებას და სხვა “წვრილმანებს”. სოლიდური თანხა გამოვიდა? არა უშავს, დროა დაფინანსების შესაძლებლობებზე იფიქროთ.

3.4 სტიპენდიები – Scholarships/Financial Aid - ამ სექციაში უნივერსიტეტი აქვეყნებს ინფორმაციას დაფინანსების სხვადასხვა შესაძლებლობების შესახებ, დაწყებული სრული სტიპენდიიდან (რომელიც საცხოვრებელ და სასწავლო ხარჯებს დაფარავს), დამთავრებული ნაწილობრივი გადასახადებით, მუშაობა+სწავლის პროგრამებით. ნებისმიერ ქვეყანაში სტუდენტებს არასრული განაკვეთით მუშაობის უფლება გააჩნიათ. უნდა ითქვას, რომ აპლიკაციის გაგზავნა სტიპენდიის მოსაპოვებლად არ არის იმის გარანტია, რომ მას მიიღებთ. შეიძლება სტიპენდიის მისაღებად რამდენიმე ეტაპის გავლა გახდეს საჭირო (საბუთების შერჩევა, ინტერვიუ), ან – მარტივად – მხოლოდ დოკუმენტებში ფინანსური საჭიროების მითითება იყოს საკმარისი - ყველა უნივერსიტეტს საკუთარი პოლიტიკა აქვს. როგორც წესი, აქ კონკურენცია მაღალია, (ფინანსური) რესურსები შეზღუდული და მხოლოდ ძლიერი კანდიდატები გადიან ფინალამდე.

ეს არის მინიმალური აუცილებელი ინფორმაცია გადაწყვეტილების მისაღებად. ეს ყველა სექცია პირველივე გვერდზე უნდა ჩანდეს. წინააღმდეგ შემთხვევაში ადვილად მისაგნებად შეგიძლიათ გამოიყენოთ ძებნის ფუნქცია,  A-Z Index, ან საიტის რუკა.

დამატებითი კრიტერიუმები, როგორიცაა კომფორტული სასწავლო გარემო, სტუდენტური სერვისები, სიახლოვე ქალაქთან/გასართობ ცენტრებთან, კარგი ბიბლიოთეკა, სპორტული კომპლექსი და ა.შ. – უკვე მეორე ეტაპის საქმეა. მათი მოძებნა მოგვიანებითაც შეიძლება, როდესაც უნივერსიტეტების მოკლე ჩამონათვალის კიდევ უფრო შემცირებას გადაწყვეტავთ.

წარმატებას გისურვებთ.

ბაგინეთი – 2014


ბაგინეთი ის ადგილია, სადაც მომაბეზრებელი ქალაქისგან ცოტა ხნით დასვენება შეიძლება. ბაგინეთიდან მცხეთა-ჯვარისკენ დიდებული ხედი იშლება. ჩამოედინება მდინარე მტკვარი, ჩანს წითელსახურავიანი სახლები. შემოდგომის ფერებს ბუნებრივად ეხამება ქალაქის ხედი.

მცხეთა. ხედი ბაგინეთიდან

მცხეთა. ხედი ბაგინეთიდან

აქ არ არის ხმაურიანი ქუჩები, არც  მანქანები და არც  ინტერნეტი ( :) ). ინტერნეტი საიდან იქნება, ბაგინეთის მთელი არსებობის მანძილზე ასეთ რამეს ოცნებაშიც კი ვერ წარმოიდგენდნენ მისი მკვიდრები. ლეონტი მროველი ირწმუნებოდა, რომ ბაგინეთის დასახლებას ქართველთა მამამთავარმა ქართლოსმა ჩაუყარა საფუძველი. ეს იყო ანტიკური ხანის დიდი, აყვავებული ქალაქი, მნიშვნელოვანი სავაჭრო-პოლიტიკური ცენტრი, რომლის გამაგრებული კედლები რამდენიმე კილომეტრს მოიცავდა. მას ჰქონდა გამართული ინფრასტრუქტურა, ფუნქციონირებდა რელიგიური დაწესებულებებიც. დაწვრილებითი ინფორმაცია ამ კულტურული ძეგლის შესახებ ძეგლები.გე-ს ვებსაიტზეა გამოქვეყნებული.  იგი მდებარეობს თბილისი-მცხეთის გზაზე, პირდაპირ გადაჰყურებს სვეტიცხოველს. ზედ გზისპირზე “ბაგინეთის” ნიშნულია, ბილიკს მიჰყავხარ კიბეებამდე, კიბე კი ანტიკური ხანის ციხე-ქალაქში მიგიძღვება. შესასვლელში შემორჩენილია დიდგვაროვანი ქალის აკლდამა, ცოტა ზემოთ – რამდენიმე სხვადასხვა დანიშნულების შენობა.

ბაგინეთი პირველად 2007 წელს ვნახე. მაშინ მისასვლელ ბილიკს ბალახებში ვეძებდით. თავად ძეგლიც სავალალო მდგომარეობაში დაგვხვდა – მიტოვებული, ატყევებული, ეკალ-ბარდებში ჩამალული ნანგრევები. ახლა, როდესაც გზას ნაქალაქარისკენ შევუყევი, უარესს ველოდი – 7 წელიწადში რამდენი რამე შეიძლებოდა განადგურებულიყო… მაგრამ ნანახმა სასიამოვნოდ განმაცვიფრა: ისე გაესუფთავებინათ ვეღარ ვიცანი! თითოეული შენობის წინ დაუმაგრებიათ საინფორმაციო დაფები, რომლებიც მის დასახელებას, ისტორიულ-არქიტექტურულ მონაცემებს შეიცავს.

2007 წელს ეს 2-საკნიანი ნაგებობა ბალახსა და ბუჩქებში იყო ჩამალული, კედლებზე ბალახი მოდებოდა.

2-საკნიანი ნაგებობა. 2007

2-საკნიანი ნაგებობა. 2007

იგივე 2-საკნიანი შენობა, 2014 წელს. განსხვავება ნათელია – ბუჩქები ამოძირკვულია, გზა – გაკვალული, გარემო – გასუფთავებული.

2-საკნიანი ნაგებობა 2014 წელს

2-საკნიანი ნაგებობა 2014 წელს

იგივე ადგილი, ხედი ცოტა შორიდან, საიდანაც მთელი შენობა, მისი საინფორმაციო დაფა და მისასვლელი ჩანს. ამას ვინ წარმოიდგენდა 7 წლის წინ :)

2-საკნიანი შენობა ბაგინეთში

ბაგინეთი-2014

 ესეც 2007 წლის ფოტოა, სადაც წარმართული ტაძრისა და მარნის ნანგრევები ჩანს. ტაძარს ქრისტიანობის შემოსვლამდე უარსებია.

მარანი ბაგინეთში. 2007

მარანი ბაგინეთში. 2007

ესეც 2014 წლის შემოდგომაზე. მიუხედავად იმისა რომ სხვა კუთხიდანაა გადაღებული, განსხვავება მაინც აშკარაა: მოსწორებული და გალამაზებული ტაძრის შიდა სივრცე, რაც გამოკვეთავს მის ფორმას. შუაგულში ღვთაების ქანდაკება მდგარა. ვინ იყო, რა იყო, როგორ ეწეოდნენ ღვთისმსახურებას – ახლა ძნელი სათქმელია, რადგან ქრისტიანობის შემოსვლის შემდეგ წინაქრისტიანული რელიგიის ყველანაირი ნიმუში განადგურდა.

წარმართული ტაძრის ნანგრევები. ბაგინეთი. 2014

წარმართული ტაძრის ნანგრევები. ბაგინეთი. 2014

გადახურულია მარანი, რაც მას იცავს წვიმისა და დაზიანებისგან.

მარანი ბაგინეთში. 2014

მარანი ბაგინეთში. 2014

ასევე შემორჩენილია სამეფო აბანოები, ახალი წელთაღრიცხვის I-II საუკუნეების სხვადასხვა დანიშნულების შენობები, თიხის მილებით მოწყობილი რთული წყალგაყვანილობის სისტემა. ეს ყველაფერი მოწმობს ანტიკური ხანის მდიდარი და გავლენიანი ქალაქის არსებობას.

ალაგ-ალაგ მოწყობილია სკამები ვიზიტორების მოსასვენებლად. ასევე საინფორმაციო დაფები, რომლებიც მთლიანი ძეგლის ან მისი ნაწილების მოკლე აღწერასა და დანიშნულებას შეიცავს. ფოტოზე ასევე ჩანს ნაგვის ურნა. ასეთები ძეგლის ტერიტორიაზე რამდენიმეა.  (ასეთები კი ბაგინეთში რამდენიმეა). ადმინისტრაცია ზრუნავს ბაგინეთის სისუფთავეზე, ტურისტებს ისღა დარჩენიათ საკუთარი წვლილი შეიტანონ ამაში. სულ ადვილია ნარჩენების ურნამდე მიტანა და შიგ ჩაგდება.

სკამები და საინფორმაციო დაფა ბაგინეთში. 2014

სკამები და საინფორმაციო დაფა ბაგინეთში. 2014

ბაგინეთში ჯერ კიდევ მიმდინარეობს გათხრები და არქეოლოგები ალბათ კიდევ ბევრ საინტერესო აღმოჩენას გააკეთებენ .

არქეოლოგიური სამუშაოები

არქეოლოგიური სამუშაოები

“მეზობლები არ შეაწუხოთ” ანუ რატომ არ უნდა გაჩერდეთ სასტუმრო “ფიჭვნარში”, ქობულეთი


“დაბოღმილი” პოსტი, რომელიც აუცილებლად უნდა წაიკითხოთ.

თითქმის ერთი კვირა ქობულეთში გავატარე – სასტუმრო “ფიჭვნარი”, აღმაშენებლის 626. ეს ის ადგილია, სადაც არ უნდა წავიდეს ადამიანი, ვისთვისაც სერვისები მნიშვნელოვანია. სასტუმროს უპირატესობა მხოლოდ ზღვასთან სიახლოვე და ფასია, სხვა დანარჩენი კრიტიკას ვერ უძლებს.

1. საოცრად უყურადღებო პერსონალი. ყველა ჩვენს თხოვნას აბსოლუტური გულგრილობით ხვდებოდნენ. რატომღაც დარწმუნებული იყვნენ რომ სასტუმროში ყველაფერი რიგზე იყო. საუზმეზე დაგვიანებულებს მისალმების მაგივრად შეცხადებით გვეგებებოდნენ: “უი, თქვენ ახლა მოხვედით?!”  და თუ არ ეტყოდი აზრადაც არ მოსდიოდათ საკვების შეთავაზება/მოტანა. ღამე ციოდა, თბილი საბნები ვთხოვეთ და უხეშად მოგვიშორეს (“მთელი დღე დავრბივართ და ვერ მოგიტანთ”). ვინც მეტი დაჟინება გამოიჩინა, საკმაოდ თხელი და სუნიანი დასაფარებელი მისცეს (მაინც სციოდათ). სასტუმროს პატრონმა უტაქტო და შეურაცხმყოფელი შენიშვნა მისცა ჩვენს უცხოელ სტუმარს წონასა და ფორმაზე. რა თქმა უნდა, ეს უკანასკნელი ძალიან ნაწყენი დარჩა.

2. ბევრ ოთახში ცხელი წყალი არ მუშაობდა. როდესაც სასტუმროს პატრონს ამის შესახებ ეუბნებოდნენ, საპასუხოდ უმტკიცებდა რომ წყალი ყველგან ცხელდება! ( :D ) არადა ფაქტი ჯიუტი იყო – ტრენინგის მონაწილეების მესამედს მაინც ცხელი წყლისთვის მეზობელ ოთახებში უხდებოდა მიგრაცია.

3. საკვები – ძალიან უბრალო და უგემური. ერთადერთი პიცა მომეწონა, დანარჩენი ყველაფერი ძალიან ცუდი მზარეულის უგულოდ გაკეთებული იყო.

4. საკონფერენციო დარბაზი – სრული კოშმარი! ჯერ ნახევრადსარდაფი, შემდეგ – უწესრიგოდ მიყრილი სკამები და მაგიდები (რომლებიც აშკარად არასაკმარისი იყო 30+ ადამიანისათვის), გარდა ამისა – მოშლილი ელექტროგაყვანილობა. ერთადერთი ნათურა სუსტად ანათებდა ოთახს და ნახევრად ბნელში გვიხდებოდა ყოფნა.

5. ეკონომია – ყველაზე უარესი და ძუნწი გაგებით. დაწყებული იქიდან რომ 3-კაციან ოთახში 1 პატარა პირსახოცი დაგვხვდა, დამთავრებული მბჟუტავი ნათურებით და თითქმის ყველა დეტალით. ნაგვის ურნა ზოგ ოთახში იდგა, ზოგში არა. აზრად არავის მოსდიოდა ქაღალდის ან საპნის დამატებით შემოტანა (ერთხელ ვთხოვეთ – დაიკიდეს. მეორედ უკვე მოვთხოვეთ და – “არ იყო?” – გაუკვირდათ. კიდევ უფრო გაოცდნენ როცა გაიგეს რომ იყო და გათავდა. შემდეგ – “თუ არის მოვიტანთო”. ეჰ…). მენიუც ვერ უძლებდა კრიტიკას. მაცივარში ჩანდნენ წინა სადილიდან მორჩენილი საკვები და ლიმონათის ნახევრად დაცლილი ბოთლები… პერსონალი თურმე ცივ წყალში რეცხავდა ჭურჭელს (ესეც შემოგვჩივლეს). ყავა პირველივე დღის ბოლოს დამთავრდა. სასმელად ლიმონათი მოგვართვეს - ძალიან იაფფასიანი, რომელსაც მე პირადად არ ვეკარები. 90-იანების წვენებს მაგონებს, ფხვნილები რომ იყიდებოდა, ცივ წყალს დაასხამდი, შეანჯღრევდი და მზად იყო. მაშინ სხვა ალტერნატივა არ გვქონდა, მაგრამ ახლა? როცა ნაირ-ნაირი ცივი და ცხელი სასმელებით სავსეა მარკეტები…. ??? :)

6. პერიოდულად – “ადრე დაიძინეთ, მეზობლებს აწუხებთ” (!!!! :D). რამდენად წუხდებოდა მეზობელი კიდევ საკითხავია :D უკანასკნელ  ღამეს, როდესაც ფილმზე ვმუშაობდით და მასალებს ვამონტაჟებდით, განრისხებული მასპინძელი შემოგვივარდა – როდემდე უნდა გაგრძელდეს თქვენი ასეთი საქციელი, მესამე სართულიდან ხმაური გამოდისო. ავედით, ვნახეთ – სრული სიწყნარე იყო. მაგრამ “მეზობლები მაინც წუხდებოდნენ”. :)

(ჯუსტ ინფორმაციისათვის: ხმაურები, ღამის თევები, დალევა, მოწევა, სიმღერები, ფრისბის თამაში, ჯოკერი, სიურპრიზები, პრიკოლები და ა.შ. ყველა ტრენინგის თანამდევი მოვლენებია.).

რჩევა ბანკებს, რომლებიც სასტუმროს გახსნისათვის კრედიტებს იძლევიან: “სასტუმრო”, თუნდაც “ჰოსტელი”, მხოლოდ კედლები არ არის. ვისაც “სერვისის” მნიშვნელობა არ ესმის, კრედიტი არ უნდა მისცეთ! ან შესაბამისი ტრენინგების გავლა დაავალდებულეთ, ან შეეგუეთ იმ აზრს რომ მალე გაკოტრდებიან!

რჩევა სასტუმროს უცხვირპირო მფლობლებს: ისწავლეთ ღიმილი და სტუმრის დახვედრა! მეზობლებზე თუ ზრუნავთ შეეშვით ბიზნესს, შემოსავლის მიღება თუ გინდათ გამოიმუშავეთ ურთიერთობის ელემენტარული უნარ-ჩვევები!

რჩევა მათ, ვინც “ფიჭვნარში” გაჩერებას ფიქრობს – გამოუვალი მდგომარეობა თუ არ გაქვთ, არ ღირს!

ფიქრები ვეფხისტყაოსანზე


“ვეფხისტყაოსანზე” სერიალს გადავიღებდი – პოლიტიკურ დრამას, რაღაც “სკანდალის” მსგავსს, თავისი ჩახლართული ინტრიგებით, გულისამაჩუყებელი სასიყვარულო ისტორიებით (ცოტა რომანტიკა ყველა დრამას სჭირდება, მარილივით), სასტიკი და ცივგონებიანი პერსონაჟებით. აი ასეთებით:

ავთანდილი – ნიჭიერი, მიზანმიმართული, კარიერისტი ახალგაზრდა მკვეთრად გამოხატული ამბიციებით. ყველაფერში მაქსიმალისტია, არსებული მდგომარეობა არ აკმაყოფილებს, უმაღლეს წრეებს ეპოტინება. ამისათვის აუცილებლად მიაჩნია ზემაღალი წარმოშობის ქალიშვილზე ქორწინება. მისი გრძნობები თინათინის მიმართ უფრო წინსვლისკენ მისწრაფებით არის განპირობებული, ვიდრე გულწრფელობით. სექსისა და საყვარლების ნაკლებობას არ უჩივის, უყვარს ფარიკაობა, სიმღერა, მიზანში სროლა, სანაძლეოების დადება.

თინათინი – ძალად-ქალიშვილი, რომელსაც მამა და გარემოებები მამრებთან ურთიერთობის მაგივრად ხელში სახელმწიფოს მართვის სადავეებს ჩრიან. თინათინს ძალიან უნდა გათხოვება, კარგად ესმის რომ სექსისთვის ქორწინების მოწმობა სჭირდება და ამისათვის პირველივე შესაძლებლობას იყენებს. მისი ფარული შეხვედრები და თათბირები ავთანდილთან სავსეა მაცდუნებელი ალერსით, თუმცა LogIn-ამდე საქმე არასოდეს მიდის – ჯერ ბეჭედი, შემდეგ “ის” – ასეთია თინათინის პოზიცია.

როსტევანი – მეფე შესაშურად დიდი სტაჟით. ბოლოსდაბოლოს მოსწყინდა ამდენი მართვა, ამდენი “მეფე ხარ და ხამს” და გადაწყვიტა პენსიაში გასვლა. როსტევანს ერთი სული აქვს როდის გადადგება ტახტიდან, მოაწყობს ორგიებს , ფეხშველი ირბენს ცვრიან ბალახზე ან პირდაპირ ქვაბიდან მოპარავს სასახლის მზარეულს საჭმელს. თავიდან ძალიან აღიზიანებს ავთანდილის თავხედობა, ალაგ-ალაგ მახეებსაც უგებს რომ ამბიციები გაუქროს, მაგრამ საპირისპირო შედეგს იღებს და ბოლოს ბედს ეგუება.

ნესტან-დარეჯანი – პუბერტატული ასაკის თინეიჯერი გოგო, რომელსაც სექსის გარდა ყველაფერი ფეხებზე ჰკიდია. იგი მზადაა დანებდეს პირველივე შემხვედრს, თუნდაც ყველაზე სულელს მაგრამ სილიკონით გაბერილი კუნთებით. უფრო მეტიც, ვნება ისეთი დაუფიქრებელი საქციელისკენ უბიძგებს, როგორიც საერთაშორისო კონფლიქტის გაღვივებაა.

ტარიელი – თავცარიელი, მაგრამ უზომოდ კუნთებდაბერილი არსება. ხასიათებით “კარგი ბიჭი”, აი ისეთი, დედიკოს რომ ყოველთვის უჯერებს და თავად არაფრის გადაწყვეტა შეუძლია. კაცი – ზლუქუნა, “მითხარი-და-შევასრულებ”, გოგოს-უნახავი, ფანატიკოსი და მშიშარა, რომელიც საკუთარ ქმედებებზე პასუხისმგებლობას გაურბის. ეს არის სუსტი ბიჭი, კიდევ უფრო სუსტი მამაკაცი. მოკლედ – ნესტან-დარეჯანისნაირი კაპრიზიანი გოგოსთვის იდეალური საქმრო.

ნურადინ-ფრიდონი – ჟან კლოდ ვანდამის მოწაფე. მაგრამ როგორც ჩანს რამდენიმე მეცადინეობა გააცდინა, იმიტომ რომ მოქმედების განვითარებისას შეცდომებს უშვებს საბრძოლო ხელოვნებაში, სტრატეგიასა და ტაქტიკაში. ფრიდონის საქციელს ორი რამ წარმართავს – ვნება და ხმალი, მაგრამ როდესაც საქმე არჩევანზე მიდგება, აუცილებლად ამ მეორეს ირჩევს. ბოლოს მიხვდება რომ მისი ჭეშმარიტი მოწოდება მამაკაცებია და ქალები არ აინტერესებს.

ფარსადანი – პოლიტიკაზე ფანატიკურად შეყვარებული მონარქი. პოლიტიკაა მისი მოწოდებაც, ხელობაც, ვნებაც და ყველაფერი. იგი მხოლოდ პოლიტიკით სულდგმულობს, მხოლოდ ახალი გეგმები ახარებს. იმდენად იშვიათად იცლიდა ცოლთან სექსისთვის რომ ბეეეეეეევრი წლები დასჭირდა ერთი გოგოს გასაკეთებლად. შვილს რომ საქმეებში ხელი არ შეეშალა, კოშკში გამოკეტა და მისი აღზრდა თავის ქვრივ დას მიანდო. ფარსადანი ქალთმოძულეა, ქალები მხოლოდ შვილების გასაჩენად ან პოლიტიკური გარიგებებისთვის სჭირდება. იგი აზარტული პოლიტ. მოთამაშეა, ხანდახან ფსონებსაც დებს ხოლმე კონკრეტულ შედეგზე თავისივე დაარსებულ “ფარსადან-ბეთ”-ში.

დავარი – ფარსადანის და. ოჯახური კონფლიქტისას შემოაკვდა თავისი ქაჯი ქმარი და სოციალურ-პოლიტიკური თავშესაფარი ძმამ მისცა. მერე აღსაზრდელად ერთადერთი ქალიშვილი მიაბარა. დავარის დევიზია “როგორც მე დავიტანჯე ისე სხვები უნდა დაიტანჯონ”. მოვლენების განვითარებისას უკვე კლიმაქსის პერიოდი აქვს და ქალთმოძულე ძმასთან გატარებული ბავშვობა, სადისტ ქმართან გატარებული ახალგაზრდობა, ჩაკეტილი ცხოვრების უარყოფითი მხარეები ერთდროულად იჩენს თავს.

ასმათი – ფარსადანის უკანონო შვილი რომელიღაც მოახლისგან, ნესტან-დარეჯანის თანაშემწე ახალგაზრდა ქალი, კაი გაქექილი ვინმეა. ჩამოყალიბებული აქვს მსტოვრების აპარატი, რომლებიც ცნობებს აწვდიან სხვადასხვა წყაროებიდან, მათ შორის ფარსადანის სასახლიდან. ფულს შოულობს ენების მიტან-მოტანაში, ჩჲნოვნიკების მოქრთამვაში, (ფარული) გარიგებების დადებაში. იგი არის უზარმაზარი ამბიციებით, უზომოდ ჭკვიანი, შეუძლია ადამიანებით მანიპულირება. დიდი გავლენა აქვს ნესტან-დარეჯანზე, ფარულად ეწევა მის სექსუალურ განათლებას.

შერმადინი – ავთანდილის მოურავი, მლიქვნელობის დიდოსტატი. აწარმოებს შავ ბუღალტერიას და შეუმჩნევლად აკოტრებს პატრონს.

ფატმან-ხათუნი – ემანსიპირებული მშვენიერი ქალი, უზომოდ მდიდარი და გავლენიანი. შეიძლება ითქვას, რომ იგი არის გულანშაროს არაფორმალური ლიდერი. აკონტროლებს აბრეშუმის ბიზნესს, არის ალკოჰოლური სასმელების მონოპოლისტი და ასევე ფლობს იატაკქვეშა საროსკიპოებსა და სექს-შოპებს. ჰყავს ყოვლად უსარგებლო ქმარი და ცეცხლოვანი ახალგაზრდა საყვარელი, რომელიც ეხმარება ბიზნესების მართვაში.

უსენი - ფატმანის მარიონეტი ქმარი. იგი ძალიან ბრიყვი და მსუქანია, აკმაყოფილებს ცოლის მიერ გადაგდებული გროშები, მეფის აღლუმებსა და მიღებებზე საჩვენებელი მონაწილეობა და არაფრისმომცემი საუბრები. სინამდვილეში მისი გავლენა ვაჭართა ქალაქში ნულის ტოლია. თუ მას ანგარიშს უწევენ, მხოლოდ ფატმანის ხათრით.

მელიქ-სურხავი – გულანშაროს ავზნიანი მეფე. ოდესღაც ფატმანს საყვარლობა შესთავაზა და მისგან უარი რომ მიიღო, დაიბოღმა, გადაემტერა, ცდილობს ბიზნესები წაართვას, ათასგვარ ინტრიგას უწყობს, მაგრამ მაინც არაფერი გამოსდის. ფატმანი მასზე გაცილებით ჭკვიანი და შორსმჭვრეტელია.

რამაზი – ხატაეთის მეფე, ყველაზე ვერაგი და დახვეწილი ინტრიგანი, ძალიან სიმპატიური, ძალიან ჭკვიანი, ძალიან პოპულარული ქალებში და ასევე ძალიან სამართლიანი საკუთარი ხალხის მიმართ, ე.ი. მათთვის საყვარელი მონარქი. კაცი, რომელიც იბრძვის თავისი ქვეყნის ტერიტორიული მთლიანობისთვის, დამოუკიდებლობისთვის. პატრიოტი, კარგი სტრატეგი და მეომარი.

სერიალში აუცილებლად წარმოჩინდებოდა ის მომენტი, როცა ტარიელი ხვდება რომ კაპარჩხანა თინეიჯერ გოგოზე მეტად საინტერესო გამოცდილი ქალია და ასმათთან გააჩაღებდა თავბრუდამხვევ რომანს. მათი ერთად ცხოვრება გამოქვაბულში ტარიელის ყველაზე ბედნიერი დღეები იქნებოდა. და ასმათისთვის შემდგომში ერთი სამეფოს გამოყოფა – ერთგვარი ალიმენტი მათი საერთო ბავშვისთვის.

ასევე გამოიკვეთებოდა მიყურადებისა და თვალთვალის სისტემები, სადაც ყველა ერთმანეთს უსმენს – როსტევანს – ავთანდილი, ავთანდილს- შერმადინი, შერმადინს – ვინმე უნიფხვო მსახური. იქნებოდა დასმენები, დანაშაული და სასჯელები, თავის მოკატუნება ვითომ სადღაც სიყვარულია, უცხო ქალის შეგზავნა თავაშვებულ ავთანდილთან მისი მოკვლის მიზნით (იმიტომ რომ შურიანი და ვერაგი ვეზირები ეყოლებოდა როსტევანს), ხატაეთისა და ინდოეთის რთული ურთიერთობები, ხვარაზმის ჩმორი სამეფო მონური ფსიქოლოგიის მმართველებით, ქაჯეთის ციხე – ერთგვარი სპარტა იარაღსა და ძალადობაზე გადარეული მამაკაცებით; ადამიანების სულიერი ტრანსფორმაციისა და ტანჯვის საათები, როცა აცნობიერებენ, რომ რეალობა და სურვილები ხშირად არ ემთხვევიან ერთმანეთს…

მოინტელექტუალურო მკითხველებს შევახსენებ, რომ ამგვარი ტიპის სერიალში აფორიზმების ადგილიც რჩება, რელიგიისაც (ოღონდ არა მართლმადიდებლური ქრისტიანობის, ოლოლო თქვენ! :) ), ფილოსოფიისაც, ფსიქოლოგიისაც, მედიცინისაც, ასტროლოგიისაც და კიდევ ათასი ხარახურისაც, რასაც რეჟისორის ფანტაზია გასწვდება.

საინტერესო იქნებოდა, რას იტყვით? ;)

როგორ გავფრინდეთ ევროპაში იაფად


ყველაფერი ოცნებიდან იწყება. ჯერ აზრი იბადება, მერე – მიზანი, შემდეგ ნელა-ნელა მოქმედების გეგმა მუშავდება და ერთ მშვენიერ დღეს აღმოაჩენ რომ ოცნება რეალობად იქცა. ყველაზე წარმოუდგენელი ფანტაზიაც კი შეიძლება ახდეს. არ გჯერათ? მფრინავი ხალიჩა გაიხსენეთ, ალადინს რომ დააქროლებდა და პარალელი გაავლეთ თანამედროვე საფრენ აპარატებთან. შერეკილები, ანუ ადამიანები, რომლებიც “რეალობას” არაფრად აგდებენ და საკუთარი ოცნების ასახდენად მუშაობენ, ცვლიან მსოფლიოს.

ძმებმა რაიტებმა 1903 წელს თავიანთი პირველი 12-წამიანი ფრენით მთელი მსოფლიო გამოიწვიეს. თავიდან არავის სჯეროდა. “ადამიანს შეუძლია ხმელეთზე სიარული, ცურვაც, მაგრამ ფრენა? არა, ეს მეტისმეტია”, – ფიქრობდნენ ისინი. რაიტებს უამრავი ცნობისმოყვარის თვალწინ საკუთარი მიღწევის დემონსტრაცია სჭირდებოდათ, ისინი უფროდაუფრო ხანგრძლივი ფრენებით და გაუმჯობესებული თვითმფრინავის მოდელებით აოცებდნენ ცივილიზებულ საზოგადოებას.

ძმები რაიტების თვითმფრინავის მოდელი ჩიკაგოში

ძმები რაიტების თვითმფრინავის მოდელი ჩიკაგოში

2011 წელს ჩიკაგოს მეცნიერებისა და ინდუსტრიის მუზეუმში მათი პირველი საფრენი აპარატის მოდელი ვნახე, რომელმაც ვნებათაღელვის თეორიები, ვერტიკალური და ბრუნვადი სიყვარულები ხელშესახები გახადა. ადამიანი შეეჯიბრა ჩიტებს, დაიწყო ჰაერის დაპყრობა, დროისა და სივრცის გადალახვა. უცხო ქვეყნების მონახულება უფრო ხელმისაწვდომი გახდა და ნებისმიერ პიროვნებას მიეცა საშუალება თავი ისე ეგრძნო, როგორც მარკო პოლოს ახალი მიწების მონახულებისას. იმ განსხვავებით, რომ საჰაერო გზის “აღმოჩენამ” წარმოუდგენლად შეამოკლა დრო თუნდაც ყველაზე შორეული დანიშნულების ადგილამდე მისასვლელად. XVIII საუკუნის დასაწყისში სულხან საბა ორბელიანს რამდენიმე თვე, უამრავი რესურსი, კლიმატური და რელიეფური სიძნელეების გადალახვა დასჭირდა ევროპამდე ჩასაღწევად, თანამედროვე თვითმფრინავები კი იგივე მანძილს სულ რამდენიმე საათში ფარავენ.

ფრენების მიმართულება ქუთაისის ეროპორტიდან

ფრენების მიმართულება ქუთაისის აეროპორტიდან

ასე რომ, თუ ევროპაში მოგზაურობაზე ოცნებობ, ამის გაკეთება ძალიან ადვილია: ქუთაისის საერთაშორისო აეროპორტიდან იაფი რეისები რამდენიმე ქვეყნის მიმართულებით სრულდება. მათგან ზოგიერთში შესასვლელად ვიზა არ არის საჭირო (უკრაინასა და ბელორუსიაში). მგზავრებმა ასევე შეიძლება ისარგებლონ გამარტივებული სავიზო რეჟიმით, რაც ნიშნავს რომ მათ შეუძლიათ 3-დან 90 დღემდე ერთჯერადი ვიზების მიღება აეროპორტში, სასაზღვრო სამსახურში. ასეთი ქვეყნების სია, ასევე სავიზო დოკუმენტების ჩამონათვალი გამოქვეყნებულია საქართველოს საგარეო საქმეთა სამინისტროს საიტზე.

როგორ მივიდეთ ქუთაისის აეროპორტამდე:

დავით აღმაშენებლის სახელობის ქუთაისის საერთაშორისო აეროპორტი, ეგრეთწოდებული კოპიტნარი, მდებარეობს თბილისიდან 255, ქ. ქუთაისიდან კი 28 კილომეტრის დაშორებით.

ქუთაისის აეროპორტამდე მისვლა შესაძლებელია საკუთარი სატრანპორტო საშუალებით ან ტაქსით, მაგრამ რა ქნან მათ, ვინც თბილისიდან მიიბარგება, არც მანქანა ჰყავს და გადაჯდომებიც არ სურს?

Georgian Bus მგზავრებს ელოდება

Georgian Bus მგზავრებს ელოდება

ასეთ შემთხვევაში უნდა მიმართონ Georgian Bus-ს, რომელიც უზრუნველყოფს მგზავრების ტრანსპორტირებას აეროპორტამდე და უკან, ასევე რამდენიმე სხვა მიმართულებით (გუდაური, ქუთაისის ცენტრი, ბათუმი, ურეკი, ქობულეთი, ზუგდიდი, ხაშური, გორი, თბილისი). თბილისში Georgian Bus-ის ბოლო გაჩერება პუშკინის ბაღთანაა (თავისუფლების მოედანი).

გასულ კვირას სწორედ მათი მიკროავტობუსით ვიმგზავრე და სასიამოვნოდ გაოცებული დავრჩი: ტრანსპორტი იყო სუფთა, ჩართული კონდიციონერით, მუსიკაც არ მაწუხებდა და ყველაზე დაუჯერებელი – არამწეველი მძღოლი! იმ ფონზე, რომ საქართველოში ტაქსებისა და მარშუტკების მძღოლების 99% პირდაპირ მანქანაში ეწევა, ეს სასწაული იყო!

Georgian Bus-ს დამატებითი სერვისებიც გააჩნია, მისი წარმომადგენლები ეხმარებიან ჩამოსულ ტურისტებს სასტუმროს მოძიებაში ან ადგილობრივ ტურისტულ სააგენტოებთან დაკავშირებაში.

კომპანიის საიტიდანვე შესაძლებელია ბილეთების დაჯავშნა (ესეც დამატებითი კომფორტი – სახლიდან გაუსვლელად დაგეგმავ მოგზაურობას!), სერვისის მრავალჯერადი გამოყენების შემთხვევაში კი მოქმედებს ფასდაკლების სისტემა.

აეროპორტის შენობა:

ქუთაისის აეროპორტი მცირე ზომისაა, იგი გათვლილია 600 მგზავრის მომსახურებაზე, აღჭურვილია უსაფრთხოებისა და კომფორტის თანამედროვე სისტემებით. ყველაფერი კრიალებს და როცა გარეთ მზე დაუნდობლად წვავს, შენობაში სასიამოვნოდ გრილა. რაც ყველაზე მნიშვნელოვანია – ძალიან ყურადღებიანი პერსონალი ჰყავს.

ქუთაისის აეროპორტი

ქუთაისის აეროპორტი

აეროპორტის სერვისები:

პირველ რიგში, უფასო და უპაროლო WiFi, შეგიძლიათ შეხვიდეთ ლეპტოპიდან, მობილური ტელეფონიდან ან ნებისმიერი სხვა მოწყობილობიდან. შევამოწმე – კარგად მუშაობს.

საინფორმაციო ცენტრი, სადაც ტურისტს შეუძლია მიიღოს უფასო ბროშურები და რჩევები საქართველოს რეგიონებში მოგზაურობის შესახებ.

ტურიზმის საინფორმაციო ცენტრი

ტურიზმის საინფორმაციო ცენტრი

ბილეთების დაჯავშნა (რკინიგზა, ფრენები), რაც უადვილებს ტურისტს ტრანსპორტირებას. იქვე შესაძლებელია დაზღვევის გაკეთება.

ბილეთები

ბილეთები

კაფე “მიმინო” მოფრენისა და გაფრენის დარბაზებში, სადაც მგზავრებს დანაყრება შეუძლიათ. მათი სენდვიჩები ძალიან გემრიელი იყო. ;)

კაფე "მიმინო"

კაფე “მიმინო”

თავისუფალი ვაჭრობის პუნქტი - ტურისტებს შეუძლიათ შეიძინონ ქართული სუვენირები, ტკბილეული, ღვინო და სხვადასხვა ნივთები. იხსნება ფრენამდე 2 საათით ადრე.

თავისუფალი ვაჭრობის პუნქტი

თავისუფალი ვაჭრობის პუნქტი

განსაკუთრებული საჭიროების მქონე მგზავრთა მომსახურებარაც ძალიან გასახარია. მოთხოვნის შემთხვევაში ქუთაისის საერთაშორისო აეროპორტს შეუძლია დაეხმაროს შშმ პირებს (თვითმფრინავამდე მისვლაში ან გადმოსვლაში, ბარგის წაღებაში).

საჭიროების შემთხვევაში აეროპორტი ასევე უზრუნველყოფს სამედიცინო დახმარებას.

ცხოველების ტრანსპორტირება – თუ საყვარელ ოთხფეხთან ერთად მოგზაურობას გადაწყვეტავთ, მისთვისაც გამოიძებნება თვითმფრინავში ადგილი.

გამგზავრება:

დოკუმენტები: ქვეყნის საზღვრების დატოვებისას საქართველოს მოქალაქემ თან უნდა იქონიოს მოქმედი საზღვარგარეთის პასპორტი შესაბამისი ვიზით (საჭიროების შემთხვევაში). ვადაგასული დოკუმენტის, ასევე ID ბარათის წარდგენისას არ მისცემენ ევროპაში გამგზავრების უფლებას. “არ ვიცოდი რომ პასპორტი საჭირო იყო” და მსგავსი თავის მართლებები არ ჭრის – წესი ერთია ყველასთვის. :)

ბარგი: ბარგის გარკვეული ნაწილის წაღება უფასოა, თუმცა მისი წონა დამოკიდებულია იმ ავიაკომპანიაზე, რომელსაც აირჩევთ სამგზავროდ. გაუგებრობის თავიდან ასაცილებლად უნდა გადაამოწმოთ მათ ვებსაიტზე. წინააღმდეგ შემთხვევაში ზედმეტი წონისთვის დამატებითი თანხის გადახდა მოგიწევთ. მაგალითად, Wizz Air-ის ვებსაიტზე  მითითებულია, რომ ერთი ბარგის მაქსიმალური დასაშვები წონა 32 კილოგრამია, ბელავიასთვის – მხოლოდ 20, აირზენა (Georgian Airways) ასევე განსაზღვრავს 20 კილოგრამს ეკონომ-კლასისთვის.

აკრძალული ნივთები: ანუ რისი გატანაც არ შეიძლება უსაფრთხოების მიზნებიდან გამომდინარე:

  • ასაფეთქებელი მასალა
  • აალებადი სითხეები, როგორიცაა, მაგალითად, სანთებელა
  • ტოქსიკური ნივთიერებები, გაზი
  • ვერცხლისწყალი, მჟავები და სხვა ნივთიერებები, რომლებმაც შეიძლება საფრთხე შეუქმნას ადამიანის ჯანმრთელობას.
  • ბასრი საგნები (დანა, მაკრატელი, თუნდაც მანიკურის ხელსაწყოები)  ამოიღეთ ხელბარგიდან – ჩამოგართმევენ.

უფრო სრული ჩამონათვალი შეგიძლიათ იხილოთ იმ ავიაკომპანიის ვებსაიტზე, რომლის სერვისითაც აპირებთ სარგებლობას.

აეროპორტში ასევე ხელმისაწვდომია საქართველოს ბანკის მომსახურება.

ერთ საიდუმლოსაც გაგიმხელთ – ქუთაისის საერთაშორისო აეროპორტიდან რეისებს ასრულებს ერთ-ერთი ყველაზე დაბალბიუჯეტიანი ავიაკომპანია – WizzAir. იგი საშუალებას აძლევს მგზავრებს მინიმალური დანახარჯებით მოხვდნენ დანიშნულების ადგილზე. საჭირო აღარაა საკვებით დატვირთული აქლემების წაყვანა მრავალთვიან მოგზაურობაში, თვითმფრინავს სულ რამდენიმე საათი სჭირდება აფრენიდან სხვა ქვეყნის აეროპორტში დაშვებამდე. WizzAir-ით ქუთაისი-ვარშავის ბილეთის ფასი შეიძლება დაიწყოს 80-90 ევროდან, ვილნიუსამდე მგზავრობის საფასური კი იყოს 130 ევრო (კონკრეტული დღეებისთვის ფასები და ფრენები გადაამოწმეთ ავიაკომპანიის საიტზე). ფრენის ხელმისაწვდომობა არის მგზავრთა რაოდენობის ზდის ძირითადი მიზეზი. მათი უმეტესობა უცხოელი ტურისტია, რომლებიც საქართველოში სხვადასხვა ადგილების სანახავად, ველოტურების მოსაწყობად დადიან. აეროპორტში შევხვდი წყვილს, რომელიც უკვე მეორე წელია საქართველოს სტუმრობს და ამას ქუთაისის აეროპორტის საშუალებით აკეთებს. ისინი სიამოვნებით ეცნობიან ბუნებას, ადგილობრივ ტრადიციებს, ღირსშესანიშნაობებს, აღფრთოვანებით საუბრობენ იმ კულტურაზე, რომელიც საუკუნეების განმავლობაში შეიქმნა და შემოინახა…

როგორც პოსტის დასაწყისში აღვნიშნე, ყველაფერი ოცნებით იწყება, ოცნებები კი აუცილებლად ხდება. ქუთაისის აეროპორტიდან გაიზრდება ფრენების მიმართულებებიც და სიხშირეც, ევროპული ოცნების ასასრულებლად კი ისღა დაგრჩენიათ ჩაალაგოთ ჩემოდანი და ისარგებლოთ ამ იაფი, კომფორტული შემოთავაზებით.